کمپیوٹر اور فون کی سکرین سے آنکھوں کو کیسے محفوظ رکھیں؟

گذشتہ چند برسوں سے تقریباً ہر شخص کسی نہ کسی طور پر کمپیوٹر یا سمارٹ فون استعمال کرنے پر مجبور ہے۔ دفتر میں کام کرنے والے ایگزیکٹیوز ہوں یا تفریح پر جا رہے نوجوانوں کی ٹولی، ہر طبقۂ فکر کمپیوٹر یا سمارٹ فونز سے منسلک ہو چکا ہے۔

ان میں وہ ملازمت پیشہ افراد بھی شامل ہیں جو زیادہ تر دفتری امور کمپیوٹر پر ہی انجام دیتے ہیں جس کے باعث ان کی بینائی متاثر ہوتی ہے اور چہرے پر بے وقت عینک سج جاتی ہے۔

کمپیوٹر یا موبائل فون کی سکرین سے نکلنے والی تیز روشنی آنکھوں پر اضافی دباؤ ہی نہیں بلکہ ان کی سوزش، درد اور خشکی کا باعث بھی بنتی ہے جن سے بچنے کے لیے کچھ احتیاطی تدابیر کے علاوہ احتیاط ضروری ہے۔

آنکھوں کی حفاظت اور سکرین کی چمک  

ماہرین کا کہنا ہے کہ کمپیوٹر اور سکرینز والے دیگر آلات استعمال کرنے سے آنکھوں پر مرتب ہونے والے مضر اثرات کو کم کرنے کے لیے متعدد اقدامات کیے جاسکتے ہیں جو زیل میں پیش خدمت ہیں:

کمپیوٹر سکرینز کی چمک کو مناسب رکھیں

’لاسو‘ نامی ویب سائٹ کے مطابق  کمپیوٹرسکرین کی چمک کو مناسب رکھنے کے لیے ایف ایل یو ایکس پروگرام ڈاؤن لوڈ کیا جائے جو سکرین کی چمک کو اطراف کے ماحول کے مطابق کنٹرول رکھتا ہے جس کے باعث آنکھوں پر پڑنے والا اضافی دباؤ قدرے کم ہو جاتا ہے۔

یہ پروگرام انٹرنیٹ پر بلاومعاوضہ دستیاب ہے جسے کسی بھی لیپ ٹاپ پر ڈاؤن لوڈ کیا جا سکتا ہے۔ پروگرام کو انسٹال کرنے کے بعد اس کی سیٹنگز میں جا کر سکرین کی چمک کو کنٹرول کرنے کے آپشن کو آن کر دیں۔

سکرین کی چمک کی سیٹنگز میں یہ سہولت موجود ہے کہ آپ آٹو برائیٹ کے آپشن کو محدود مدت کے لیے بند کر سکتے ہیں۔ اس کی ضرورت ویڈیو یا تصاویر کے لیے ہوتی ہے۔

سمارٹ فونز کی سکرین کی چمک

سمارٹ فونز پر سکرین کی چمک کو کم کرنے کے لیے متعدد پروگرامز موجود ہیں جنہیں انسٹال کرنے کے بعد سکرین کی چمک کو مناسب حد تک کنٹرول کیا جاسکتا ہے۔ ماہرین کا کہنا ہے کہ سمارٹ فونز کو نائٹ موڈ سافٹ ویئر پر ہی استعمال کیا جائے جو اینڈرائیڈ اور آئی فون سٹور میں دستیاب ہے۔

آنکھوں پر دباؤ

سائنسی تحقیق کے نتیجے کے مطابق وہ افراد جو زیادہ دیر تک کمپیوٹر پر کام کرتے ہیں ان کی نظر کے متاثر ہونے کے امکانات بہت زیادہ ہوتے ہیں۔

آنکھوں پر پڑنے والے دباؤ سے نہ صرف آنکھیں سرخ رہتی ہیں بلکہ جسمانی صحت پر بھی منفی اثرات مرتب ہو سکتے ہیں، جبکہ ذہنی انتشار بھی بڑھتا ہے جس کے باعث کام میں غلطیوں کے تناسب میں اضافہ ہوتا ہے۔

دیر تک کمپیوٹرکا استعمال اور آنکھوں کی حفاظت

اپنی سکرین کی روشنی کو کنٹرول کریں کیونکہ کمپیوٹر پر نظریں جمانے سے بینائی متاثر ہوتی ہے۔ اس کے لیے اپنی آنکھوں کو تھوڑی دیر آرام دیں۔ ایسا کرنے سے آپ کو ابتدا میں قدرے دشواری پیش آئے گی، تاہم وقت کے ساتھ ساتھ اس کی عادت ہو جائے گی اس طرح آپ آنکھوں کو محفوظ رکھتے ہوئے زیادہ دیر تک کمپیوٹر استعمال کر سکتے ہیں۔

سکرین کے کلر ٹمپریچر کو کم رکھیں۔ یہ ایک فنی اصطلاح ہے جو رنگین سکرینوں کے لیے استعمال ہوتی ہے۔ اس میں نیلے رنگ کی شعاعوں کو کم کیا جاتا ہے جو دیگر رنگوں مثلاً پیلے، نارنجی اور لال کی نسبت بینائی پر زیادہ اثر انداز ہوتی ہیں۔

اندھیرے میں سکرین کے استعمال سے گریز کریں۔ ماہرین کا کہنا ہے کہ سمارٹ فون یا کمپیوٹر کو کبھی مکمل اندھیرے میں استعمال نہ کریں۔

اندھیرے میں کمپیوٹر یا سمارٹ فون کی سکرین سے نکلنے والی روشنی براہ راست آنکھوں پر اثر انداز ہوتی ہے کیونکہ اطراف میں تاریکی کی وجہ سے اس روشنی کی چمک بڑھ جاتی ہے جس سے آنکھوں پر بہت زیادہ دباؤ پڑتا ہے۔

کمپیوٹر اگر اندھیرے میں استعمال کرنا ضروری ہو تو اس صورت میں سکرین کی روشنی کو کم کریں اور زیادہ دیر تک استعمال نہ کریں۔

 آپ کی سکرین اگر چھوٹی ہے تو اس صورت میں یہ ضروری ہے کہ آپ حروف کے سائز کو بڑا کر لیں تاکہ آنکھوں پر زیادہ دباؤ نہ پڑے۔  

کمپیوٹر سکرین پر دیر تک کام کرنے والوں کے لیے ضروری ہے کہ اپنی بینائی کی حفاظت کریں اور کوشش کریں کہ آپ کی آنکھیں خشک نہ ہوں اس کے لیے وقتاً فوقتاً پلکوں کو جھپکتے رہیں۔

ماہرین کا کہنا ہے کہ آنکھ میں پیدا ہونے والی رطوبت جلد ہی خشک ہو جاتی ہے۔ اس کے لیے ضروری ہے کہ پلکوں کو ہر تھوڑی دیر بعد جھپکائیں کیونکہ آپ جیسے ہی پلکیں جھپکاتے ہیں تو نمی آنکھوں میں جاتی ہے جبکہ بہت وقفے کے بعد ایسا کرنے سے آنکھوں کی نمی خشک ہو جاتی ہے۔

ماہرین کا کہنا ہے کہ کمپیوٹر استعمال کرنے والوں کے لیے 20 منٹ کی ورزش سود مند ثابت ہوتی ہے جس کے لیے ہر 20 منٹ بعد اس مشق کو دہرائیں۔

ہر 20 منٹ بعد آنکھوں کو بند کر کے پلکوں کو 10 بار جھپکائیں جیسے کہ آپ نیند سے قبل سونے کی تیاری میں ہوں اس سے آپ کی آنکھوں کو مطلوبہ مقدار میں نمی حاصل ہو جاتے گی۔

اس ورزش سے آنکھوں پر پڑنے والے دباؤ میں بھی کمی آئے گی جس کی وجہ کافی دیر تک کمپیوٹر سکرین کو دیکھنا ہے۔

ماہرین کا کہنا ہے کہ مسلسل بغیر وقفے کے زیادہ دیر تک کمپیوٹر کا استعمال نہ کریں بلکہ درمیان میں مناسب وقفہ بھی کریں۔ اس سے نہ صرف آنکھوں پر اضافی دباؤ نہیں پڑے گا بلکہ مسلسل کام کرنے کی صورت میں کام کا معیار اور صحت متاثر ہونے کا اندیشہ بھی برقرار رہتا ہے۔