دبئی میں عرب فیسٹیول ایوارڈز: پاکستانی اور انڈین اداکاروں کی شرکت

پاکستان کے مشہور گلوکار علی ظفر نے ڈسٹنکٹو انٹرنیشنل عرب فیسٹیول ایوارڈز میں ’پاکستانی سنگر آف دی ایئر‘ کا اعزاز اپنے نام کر لیا۔

انڈین ویب سائٹ  ہندوستان ٹائمز کے مطابق پاکستانی گلوکار علی ظفر نے ایوارڈ وصول کرتے ہوئے اپنے تقریر میں فلسطین میں جاری جنگ کے حوالے سے گفتگو کرتے ہوئے کہا کہ’  ہم آرٹسٹ ہیں، اداکار ہیں، لوگوں کو تفریح فراہم کرنا ہمارا کام ہے لیکن سب سے پہلے ہم انسان بھی ہیں۔‘

انڈیا اور پاکستان کے ناموروں فنکاروں نے دبئی میں منعقدہ ڈسٹنکٹو انٹرنیشنل عرب فیسٹیول ایوارڈ میں شرکت کی۔

علی ظفر کی بالی وڈ اداکاروں کے ساتھ کئی تصاویر بھی سامنے آ رہی ہیں۔ علی ظفر کے ہمراہ ان کی اہلیہ عائشہ فضلی بھی تقریب میں موجود تھیں۔

بالی وڈ اداکارہ نرگس فخری نے اپنی انسٹاگرام سٹوریز پر کئی تصاویر پوسٹ کی ہیں جن میں ایک تصویر میں وہ ادیتی راؤ حیدری اور ترک اداکار براک ڈینیز کے ہمراہ پوز کر رہی ہیں۔

تصویر میں نرگس فخری نے سبز رنگ کا لباس زیب تن کر رکھا ہے جبکہ ادیتی راؤ حیدری نے سیاہ اور سفید لباس کا انتخاب کیا۔ براک ڈینیز کو سفید شرٹ، کریم بلیزر اور پینٹ میں نظر آئے۔ نرگس فخری نے ان تصاویر کے ساتھ کیپشن میں لجھا ’خوبصورت شام‘۔

نرگس فخری، ترک اداکار اور ادیتی راؤ حیدری نے ہاتھوں میں اپنی اپنی ٹرافیاں اُٹھا رکھی تھیں۔

ایک اور تصویر میں ادیتی راؤ علی ظفر، نرگس فخری اور عائشہ فضلی کے ساتھ سیلفی لے رہی ہیں جس میں سب کیمرے کی طرف دیکھ کر مسکرا رہے ہیں۔ نرگس فخری نے اس تصویر کو شیئر کرتے ہوئے لکھا ’ری یونین‘ اور علی ظفر اور ادیتی راؤ کو ٹیگ کیا۔

یاد رہے کہ علی ظفر اور ادیتی راؤ حیدری 2012 میں ریلیز ہونے والی فلم ’لندن، پیرس، نیویارک ‘میں ایک ساتھ نظر آئے تھے۔

ایک اور تصویر میں علی ظفر اور جیکلین فرنینڈز کو ایک دوسرے سے خوشگوار ماحول میں بات چیت کرتے دیکھا جا سکتا ہے۔

نرگس فخری ویب سیریز ’تتلوباز‘سے اپنے او ٹی ٹی ڈیبیو کے لیے تیار ہیں جس میں وہ اداکار دھیرج دھوپر کے ساتھ نظر آئیں گی۔ ادیتی راؤ حیدری پائیج سندھو کے ساتھ ’شیرنی‘ میں اداکاری کے جوہر دکھائیں گی جبکہ ان کی سنجے لیلا بھنسالی کی ’ہیرامنڈی‘ بھی پائپ لائن میں ہے۔

جیکلین فرنینڈز سونو سود کے ساتھ ایکشن تھرلر فلم ’فتح‘ میں نظر آئیں گی جو کووڈ19 کے دوران سائبر کرائم کے واقعات پر مبنی ہے۔ ویبھو مشرا کی ہدایت کاری میں بننے والی اس فلم میں شیو جیوتی راجپوت اور وجے راز بھی مرکزی کردار ادا کر رہے ہیں۔