چھوٹے بھائی کی قبر خود کھودی، چار گھنٹے بعد بڑا بھائی بھی چل بسا

سعودی عرب کے جازان ریجن کے سعودی شہری کو چھوٹے بھائی کی موت کا صدمہ برداشت نہ ہو سکا۔ چار گھنٹے بعد ہی بڑا بھائی بھی دار فانی سے کوچ کر گیا۔  

سبق نیوز کے مطابق جازان ریجن کے گاوں الخرمہ میں مقیم 44 سالہ سعودی شہری مفرح یحیی غزوانی حسب معمول صبح کو بیدار ہوا بعدازاں اس نے بچوں کو سکول جانے کے لیے اٹھایا اسی دوران اس کی طبیعت بگڑ گئی اور وہ بے ہوش ہو کر گر پڑا۔ 

مفرح یحیی غزوانی کو العیدابی جنرل ہسپتال لے جایا گیا جہاں ڈاکٹروں نے معائنہ کرنے کے بعد موت کی تصدیق کر دی۔

مفرح کا بڑا بھائی 48 سالہ جبریل یحیی غزوانی جو 25 کلو میٹردوسرے گاوں میں رہتا تھا یہ خبرسنتے ہی فوری طورپر ہسپتال پہنچا۔  

جبریل غزوانی نے ہسپتال کے عملے سے اس بات کی تصدیق کی جب اسے یقین دلایا گیا کہ اس کا بھائی اب اس دنیا میں نہیں رہا تو وہ انتہائی بوجھل قدموں سے قبرستان چلا گیا تاکہ بھائی کی قبر کو اپنے ہاتھوں سے کھودے۔ 

 قبر تیار کرتے ہی جبریل غزاوانی کو چکر آیا اور وہ کھودی ہوئی قبر میں گرنے ہی لگا تھا کہ ساتھیوں نے اسے باہر نکال کر اسی ہسپتال میں پہنچا دیا جہاں اس کے چھوٹے بھائی کی نعش سرد خانے میں رکھی تھی۔ 

ہسپتال کے ایمرجنسی وارڈ میں طبی امداد دی گئی مگر وہ جانبر نہ ہو سکا۔ ہسپتال کے سرد خانے میں دونوں بھائیوں کی نعشوں کو رکھ دیا گیا۔ 

اس طرح زندگی میں کبھی جدا نہ ہونے والے دونوں بھائی آخرت کے سفر پر بھی ایک ساتھ ہی روانہ ہو گئے۔ ان کی موت کے درمیان محض چار گھنٹے کا فاصلہ تھا۔