دورہ آسٹریلیا: خرم شہزاد انجری کے باعث ٹیسٹ سیریز سے باہر

پاکستان کرکٹ ٹیم کے فاسٹ بولر خرم شہزاد انجری کے باعث آسٹریلیا کے خلاف ٹیسٹ سیریز کے باقی دو ٹیسٹ میچوں سے باہر ہو گئے ہیں۔

پاکستان کرکٹ بورڈ (پی سی بی) کے مطابق خرم شہزاد کو پسلی میں اور پیٹ میں تکلیف کا سامنا ہے۔

خرم شہزاد نے پرتھ میں آسٹریلیا کے خلاف پہلے ٹیسٹ میچ کے دوران اپنے بائیں جانب سٹرین کی شکایت کی تھی جس کے بعد انہیں ایم آر آئی سکین کے لیے بھیجا گیا تھا۔

پی سی بی اب آسٹریلیا میں ماہرین سے مشورہ کر کے خرم شہزاد کے لیے حتمی پروٹوکول قائم کرے گا جس کے بعد فاسٹ بولر کا این سی اے لاہور میں علاج شروع کیا جائے گا۔

پاکستانی بیٹر سعود شکیل نے جمعرات کو میڈیا سے گفتگو کرتے ہوئے کہا ہے کہ ’خرم شہزاد نے  پہلے ٹیسٹ میچ میں اچھی بولنگ کی تھی، مجھے افسوس ہے کہ وہ انجرڈ ہوگئے ہیں، یہ سب کھیل کا حصہ ہے۔‘

سعود شکیل کا مزید کہنا تھا کہ ’ہمارے پاس میر حمزہ اور حسن علی جیسے بولرز بھی موجود ہیں جو میلبورن ٹیسٹ میں وکٹیں حاصل کر سکتے ہیں۔‘

پاکستان اور آسٹریلیا کے درمیان دوسرا ٹیسٹ 26 سے 30 دسمبر تک میلبورن کرکٹ گراؤنڈ  میں کھیلا جائے گا۔

پہلے ٹیسٹ میچ میں گرین شرٹس 450 رنز کے ہدف کے تعاقب میں محض 89 رنز بنا کر آؤٹ ہو گئے تھے۔