مسام پروجیکٹ کے تحت دسمبر 2023 میں تین ہزار سے زیادہ بارودی سرنگیں صاف

یمن میں دسمبر 2023 کے دوران یمن کے مختلف علاقوں میں حوثیوں کی نصب کردہ تین ہزار 15 بارودی سرنگوں کو صاف کیا گیا ہے۔

2018 میں مسام پروجیکٹ کے آغاز سے اب تک یمن میں حوثیوں کی بچھائی گئی چارلاکھ 27 ہزار بارودی سرنگوں کو تباہ کیا جا چکا ہے۔

سرکاری خبر رساں ایجنسی ایس پی اے کے مطابق شاہ سلمان مرکز برائے امداد و انسانی خدمات کی نگرانی میں مسام پراجیکٹ کی خصوصی ٹیموں نے دسمبر میں یمن کے مختلف علاقوں سے 289 بارودی سرنگیں، 444 اینٹی ٹینک بارودی سرنگیں اور دوہزار525 بغیر دھماکے کی ڈیوائسز اور 23 دھماکہ خیز ڈیوائسزکو تباہ کیا۔

حوثیوں کی جانب سے یمن بھر میں نصب کی جانے والی بارودی سرنگوں سے بچوں، خواتین اور معمرافراد سمیت معصوم شہریوں کی زندگیوں کو شدید خطرہ لاحق ہے۔

واضح رہے کہ حوثی باغیوں کی جانب سے 1.2 ملین سے زیادہ بارودی سرنگیں بچھائی گئی ہیں جس کے باعث سیکڑوں معصوم شہریوں کے زخمی اور ہلاک ہونے کے واقعات رونما ہوئے ہیں۔

ایک اندازے کے مابق یمن جنگ کے آغاز سے اب تک 50 لاکھ افراد اپنے گھر بار چھوڑنے پر مجبور ہوچکے ہیں۔ بہت سے اپنی زمینوں پر بارودی سرنگوں کے باعث بے گھر ہوئے ہیں۔

مسام پروجیکٹ کا مقصد یمن کے مختلف شہری اور دیہی علاقوں سے بارودی سرنگوں کی صفائی کرنا ہے تاکہ معصوم شہریوں کی جانوں کو ان سے محفوظ کیا جا سکے۔

جون 2022 میں مسام پروجیکٹ کے معاہدے کو 33.29 ملین ڈالر کی لاگت سے مزید ایک سال کے لیے بڑھایا گیا ہے۔

یہ پروجیکٹ مقامی انجینیئرز کی بھی تربیت اورانہیں جدید آلات فراہم کرتا ہے جبکہ باردودی سرنگوں کی زد میں آنے والے یمنی شہریوں کی بھی مدد کی جاتی ہے۔