بشیر چوہدری -اردو نیوز، اسلام آباد
پاکستان تحریک انصاف نے قومی اسمبلی کے 266 حلقوں میں سے 233 حلقوں پر امیدواروں کا اعلان کر دیا ہے۔ کئی سابق وفاقی وزرا سمیت سابق ارکان اسمبلی کو بھی ٹکٹ جاری کیے گئے ہیں۔
متعدد وکلا اور نئے چہرے بھی پارٹی کا ٹکٹ حاصل کرنے میں کامیاب ہوئے ہیں۔
جمعے کی شام بالاخر پاکستان تحریک انصاف نے سوشل میڈیا پر اپنے امیدواروں کی فہرست جاری کی جس میں سابق سپیکر اسد قیصر سمیت سابق وفاقی وزرا مراد سعید، علی امین گنڈا پور، زرتاج گل اور کئی دیگر ارکان اسمبلی کے نام شامل ہیں۔
پاکستان تحریک انصاف نے راولپنڈی کے حلقہ این اے 56 اور 57 میں عوامی مسلم لیگ کے سربراہ شیخ رشید کے ساتھ سیٹ ایڈجسٹمنٹ سے انکار کرتے ہوئے ان کے مقابلے میں اپنے دو امیدوار میدان میں اتارے ہیں جن میں ایک خاتون ہیں۔
شیخ رشید کے مقابلہ کرنے والے شہریار ریاض اور سیمابیہ طاہر کون ہیں؟
شیخ رشید کے مقابلے میں قومی اسمبلی کے حلقہ این اے 56 سے شہریار ریاض اور این اے 57 سے سیمابیہ طاہر کو تحریک انصاف نے ٹکٹ دیے ہیں۔
عوامی مسلم لیگ کے سربراہ شیخ رشید احمد نے صدر پی ٹی آئی چوہدری پرویز الہی اور چیئرمین بیرسٹر گوہر سے ملاقاتوں میں ان حلقوں میں امیدوار نہ کھڑے کرنے کی درخواست کی تھی۔
عمران خان نے شیخ رشید احمد کی درخواست مسترد کرتے ہوئے پی ٹی آئی کے کارکنان کو ٹکٹ دینے کا فیصلہ کیا۔
شہریار ریاض
شہریار ریاض نے 2018 میں پاکستان تحریک انصاف میں شمولیت اختیار کی تھی۔ اس سے قبل وہ 2008 میں مسلم لیگ ن کی ٹکٹ پر راولپنڈی سے رکن صوبائی اسمبلی منتخب ہوئے تھے۔ 2013 کے انتخابات میں انہیں ن لیگ کا ٹکٹ نہ ملنے کی وجہ سے وہ پارٹی سے دلبرداشتہ ہوئے اور 2018 میں تحریک انصاف میں شمولیت اختیار کرلی۔
شہریار ریاض راولپنڈی یوسی ناظم بابو ریاض کے بیٹے ہیں۔ انہوں نے امریکہ کی ٹیکساس یونیورسٹی سے بی بی اے اور سول انجینئرنگ کی ڈگری حاصل کر رکھی ہے۔ وہ راولپنڈی چیمبر اف کامرس کے بھی رکن رہ چکے ہیں۔ انہوں نے اپنے سیاسی کیریئر کا آغاز 2002 میں کیا تھا لیکن کامیابی نہ حاصل کر سکے۔
سیمابیہ طاہر
تحریک انصاف نے عوامی مسلم لیگ کے سربراہ شیخ رشید کے مقابلے میں این اے 57 سے سیمابیہ طاہر کو میدان میں اتارا ہے۔
سیمابیہ طاہر پاکستان تحریک انصاف کی دیرینہ کارکن ہیں۔ وہ اسلام آباد ویمن ونگ اور یوتھ ونگ کا حصہ رہی ہیں جبکہ 2018 میں انہوں خواتین کی مخصوص نشستوں پر پنجاب اسمبلی کی رکن بھی رہ چکی ہیں۔
سیمابیہ طاہر اس وقت منظر عام پر آئی تھیں جب 2014 کے لاک ڈاؤن کے دوران احتجاج کرتے ہوئے وہ پولیس کے تشدد کا نشانہ بنیں۔ سیمبایہ طاہر سماجی کاموں میں بھی بڑھ چڑھ کر حصہ لیتی رہی ہیں۔
خواجہ آصف بمقابلہ ریحانہ ڈار
ایک اور اہم حلقے میں پاکستان تحریک انصاف نے خواجہ آصف کے مقابلے میں عثمان ڈار کی والدہ ریحانہ ڈار کو ٹکٹ جاری کیا ہے۔
ایک ٹی وی پروگرام میں عثمان ڈار کی جانب سے پاکستان تحریک انصاف چھوڑنے اور عمران خان کے خلاف تنقید کے بعد ریحانہ ڈار خود سامنے آئی تھیں اور انہوں نے اعلان کیا تھا کہ وہ خواجہ آصف کے مقابلے میں انتخابات میں حصہ لیں گی۔
ریحانہ ڈار کے کاغذات نامزدگی بھی ریٹرننگ افسر نے مسترد کر دیے تھے لیکن بعد ازاں ٹریبونل نے انہیں الیکشن لڑنے کا اہل قرار دیا۔
خیال رہے کہ 2018 کے الیکشن میں خواجہ آصف کے مقابلے میں عثمان ڈار نے انتخابات میں حصہ لیا تھا اور انہیں خاصا ٹف ٹائم دیا تھا۔
