کل مکی آرتھر آج ذکا اشرف مستعفی، ’نہ ختم ہونے والا ڈرامہ جاری ہے‘

پاکستان میں جمعے کی شام ایک خبر آئی جس کے بعد سوشل میڈیا پر ٹرینڈ اور اس حوالے سے خیالات کا اظہار کرتے سوشل میڈیا صارفین ناچنے، گانے اور بھنگڑے ڈالنے کی تصاویر اور ویڈیوز شیئر کر رہے ہیں۔

اور یہ خبر ہے پاکستان کرکٹ بورڈ کے مینجمنٹ کمیٹی کے چیئرمین ذکا اشرف کے مستعفیٰ ہونے کی۔

پاکستان کرکٹ بورڈ (پی سی بی) کی مینجمنٹ کمیٹی کے چیئر مین ذکا اشرف نے استعفے کا اعلان جمعے کو لاہور میں پی سی بی مینجمنٹ کمیٹی کے چوتھے اجلاس کے دوران کیا۔

انہوں نے پی سی نی کی مینجمنٹ کمیٹی اور تمام سٹاف کا شکریہ ادا کیا۔ سوشل میڈیا پر ذکا اشرف کے مستعفی ہونے کے حوالے سے متعدد کرکٹ شائقین کے خیال میں یہ عمل پاکستان کرکٹ کے لیے اچھا ہے۔

اور مستقبل میں کسی ایسے چیئر مین کی امید کر رہے ہیں جو پاکستانی کرکٹ کو ‘زندہ‘ کر دے۔

ایکس ہینڈل شاہ بی پر لکھا گیا کہ ’ذکا اشرف نے پاکستان کرکٹ بورڈ کے چیئرمین کے عہدے سے استعفیٰ دے دیا۔ مٹھائی بانٹ دیجیے خوشی کا ماحول ہے۔‘

ایکس یوزر رانا زیبی لکھتے ہیں کہ ’ذکا اشرف نے پی سی بی کے چیئرمین کے عہدے سے استعفیٰ دے دیا۔ امید ہے اب پاکستان کرکٹ دوبارہ بہتری کی طرف آئے گی۔‘

انہوں نے مزید لکھا کہ ’اب ایک اچھا شخص پی سی بی کے چیئر مین کے عہدے پر آئے گا اور پاکستان کرکٹ میں اچھے اقدامات کیے جائیں گے۔‘

سوشل میڈیا یوزر کرش کھردرا نے لکھا کہ ’گزشتہ روز پاکستان کرکٹ ٹیم کے ہیڈ کوچ مکی آرتھر، آج ذکا اشرف مستعفی ہو گئے۔‘

انہوں نے مزید لکھا کہ ’پاکستان کرکٹ بورڈ کا نہ ختم ہونے والا ڈرامہ جاری۔‘