مسجد نبوی امور کی جنرل اتھارٹی کا کہنا ہے کہ مسجد نبوی میں تعینات کارکن مسجد کے 1.378 ملین مربع میٹر سے زیادہ رقبے میں صفائی اور سینیٹائزنگ کا کام انجام دیتے ہیں۔
سرکاری خبر رساں ایجنسی ایس پی اے کے مطابق جنرل اتھارٹی کا کہنا ہے رمضان المبارک کے دوران 1490 کارکن جدید اور خودکار آلات کے ذریعے مسجد کے اندر، صحنوں، چھتوں اور اطراف کے حصوں کی 24 گھنٹے صفائی اور سینیٹائزنگ میں مصروف رہتے ہیں۔
مسجد نبوی امور کی اتھارٹی کا کہنا ہے مسجد کو دھونے اور جراثیم کش سپرے اور سینیٹائزنگ کے علاوہ خوشبویات سے مسجد کو معطر رکھنے کا کام رمضان میں 24 گھنٹے جاری رہتا ہے۔
رمضان میں افطار سے قبل مسجد نبوی میں صحن میں قالین بچھا دیے جاتے ہیں۔ افطار کے بعد انتہائی قلیل وقت میں کارکنان تیزی سے صفائی کے تمام کام انجام دیتے ہیں اور منٹوں میں تمام دسترخوان سمیٹ کر مسجد کی اندر اور باہر سے صفائی مکمل کر لی جاتی ہے۔
اتھارٹی کا کہنا ہے اسی طرح قالینوں اور فرش کی صفائی اور سینیٹائزنگ دن بھر جاری رہتی ہے۔ اس کے علاوہ مسجد کو 24 گھنٹے معطر رکھنے کا بھی اہتمام کیا جاتا ہے۔
اسی طرح زمزم کے خالی کولرز ہٹانے اور انہیں بھرنے اور صفائی کے لیے مختص جگہوں تک پہنچانے کا کام بھی سسٹم کے تحت کیا جاتا ہے اور ڈسپوزیبل گلاس ہٹانے اور نئے گلاسز رکھنے کا بھی کام کارکنان وقتاً فوقتاً انجام دیتے رہتے ہیں۔
