ٹی20 ورلڈ کپ: جنوبی افریقہ سیمی فائنل میں

امریکہ اور ویسٹ انڈیز میں جاری ٹی 20 ورلڈ کپ کے سپر ایٹ مرحلے میں جنوبی افریقہ نے ویسٹ انڈیز کو سنسنی خیز مقابلے کے بعد تین وکٹوں سے شکست دے دی ہے۔ 

جنوبی افریقہ کی اس فتح نے میزبان ویسٹ انڈیز کو ٹورنامنٹ سے باہر کر دیا اور جنوبی افریقہ نے سیمی فائنل میں جگہ بنا لی ہے۔ 

پیر کو انٹیگا کے سر ویون رچرڈ سٹیڈیم میں کھیلے گئے میچ میں بارش کے باعث جنوبی افریقہ کو 17 اوور میں 123 رنز کا ہدف ملا۔ روسٹن چیز نے تین وکٹیں حاصل کرتے ہوئے جنوبی افریقہ کی بیٹنگ لائن کو مشکلات میں ڈال دیا تاہم جنوبی افریقہ نے آخری اوور کی پہلی بال پر ہدف مکمل کر لیا۔ 

جنوبی افریقہ نے ٹاس جیت کر ویسٹ انڈیز کو پہلے بلے بازی کی دعوت دی تو  ویسٹ انڈین ٹیم نے مقررہ 20 اوورز میں آٹھ وکٹوں کے نقصان پر 135 رنز بنائے تھے۔ جنوبی افریقہ کی جانب سے تبریز شمسی نے 27 رنز کے عوض تین وکٹیں حاصل کیں۔ 

ویسٹ انڈیز کی جانب سے روسٹن چیز 52 رنز کے ساتھ نمایاں رہے، انہوں نے  کائل میئرز کے ساتھ تیسری وکٹ کی شراکت میں 81 رنز بنائے۔ کائل میئرز نے 35 رنز بنائے۔ 

تاہم بارش سے کھیل متاثر ہونے کی وجہ سے ڈگلس ایںڈ لیوئس قانون کے تحت جنوبی افریقہ کو 17 اووز میں 123 رنز کا ہدف ملا۔ 

میچ کے آخری اوور میں جینسن نے اوبیڈ میک کوائے کو چھکا لگا کر فتح اپنے نام کر لی۔ 

جنوبی افریقہ کی جانب سے ٹریسٹن سٹبس 29 اور ہنڈرک کلاسین 22 رنز کے ساتھ نمایاں رہے، مارکو جینسن 21 رنز کے ساتھ ناٹ آؤٹ رہے۔ 

عمدہ بولنگ پر تبریز شمسی کو پلیئر آف دی میچ کا ایوارڈ دیا گیا۔ 

سیمی فائنل میں جنوبی افریقہ کا مقابلہ انگلینڈ سے ہوگا۔ 

ٖاتوار کو سپر ایٹ کے میچ میں انگلینڈ نے امریکہ کو دس وکٹوں سے شکست دے کر سیمی فائنل کے لیے کوالیفائی کیا تھا۔