فیاض احمد -اردو نیوز، پشاور
بین الاقوامی فلم سیریز منی ہائسٹ نے پوری دنیا میں دھوم مچائی مگر اس سیریز کے تھیم پر بننے والا پشاور کا ریستوران ناکامی سے دوچار ہوا اور اپنے افتتاح کے صرف ڈیڑھ سال بعد ہی بند ہو گیا۔
بیلا چاؤ ریستوران کے مالک کا کہنا ہے کہ انہیں حکومت کی جانب سے بھاری ٹیکسوں کی وجہ سے اپنے کیفے کو بند کرنا پڑا۔
مزید پڑھیں
تہکال روڈ پر واقع اس کیفے میں ویٹرز منی ہائسٹ کے کرداروں یعنی چوروں کا لباس اور ماسک پہن کر کسٹمرز کو سروس فراہم کرتے تھے۔
اپنے منفرد انداز کی وجہ سے یہ کیفے شہریوں میں اتنا مقبول ہو گیا کہ کسی وقت بھی چلے جائیں کسٹمرز کا رش ہی دیکھنے کو ملتا۔
نہ صرف پشاور کے شہریوں بلکہ لاہور سے بھی وی لاگرز نے اس کیفے پر ویڈیوز بنائیں اور یہاں کے کھانے سے لطف اندوز ہوئے۔
ویسے تو اس ریستوران کے آس پاس دیگر فوڈ کمپنیوں نے اپنی فرنچائزز کھولیں لیکن سب سے زیادہ رونق ’بیلا چاؤ‘ میں ہی نظر آتی۔
کیفے کو بند کرنے کی وجہ کیا بنی؟
افتتاح کے ڈیڑھ سال بعد جب کیفے بند ہو گیا تو شہریوں کے ساتھ ساتھ ہوٹل اور ریسٹورنٹ انڈسٹری سے جڑے افراد بھی تشویش میں مبتلا ہو گئے کہ آخر اتنے مشہور کیفے کو بند کیوں کر دیا گیا۔
بیلا چاؤ کیفے کے مالک شعیب خٹک نے اُردو نیوز کو بتایا کہ انہوں نے ساری جمع پونچی اس کاروبار میں لگا دی تھی۔ شہریوں کے لیے منفرد آئیڈیا لے کر آنے کا مقصد معیاری خوراک کے ساتھ تفریح کا موقع فراہم کرنا تھا۔
’کیفے نے اچھی شہرت حاصل کی مگر انتظامیہ کے روّیے اور حکومتی پالیسی نے کاروبار کو شدید نقصان پہنچایا۔‘
انہوں نے بتایا کہ ’ضلعی انتظامیہ کی جانب سے مختلف وجوہات پیش کرکے تنگ کیا جاتا رہا، ہم نے پھر بھی کاروبار جاری رکھا مگر نت نئے ناموں سے ٹیکسز کی بھرمار نے کیفے کو بند کرنے پر مجبور کر دیا۔‘
شعیب خٹک نے کہا کہ ’بیلا چاؤ ایک فیملی ریستوران تھا جس میں 20 سے زائد ملازمین کام کرتے تھے مگر ہمیں بھاری دل کے ساتھ یہ کیفے بند کرنا پڑا۔‘
پشاور میں صرف ’بیلا چاؤ‘ ہی نہیں بلکہ معروف یوٹیوبر کی جانب سے کھولا گیا ’خان ٹینر‘ کیفے جس کا ایک سال پہلے دھوم دھام کے ساتھ آغاز کیا گیا تھا، قلیل عرصے میں بند کردیا گیا۔
