انگلینڈ کی ٹیسٹ کرکٹ ٹیم کے کپتان بین سٹوکس کے گھر چوری کے شبے میں ایک شخص گرفتار

انگلینڈ کی پولیس نے کہا ہے کہ ٹیسٹ کپتان بین سٹوکس کے پاکستان کے دورے کے دوران ان کے گھر چوری ہونے کے بعد ایک شخص کو گرفتار کر لیا گیا ہے۔

فرانسیسی نیوز ایجنسی اے ایف پی کے مطابق بین سٹوکس نے کہا کہ ان کی اہلیہ اور دو بچے شمال مشرقی انگلینڈ کی کاؤنٹی ڈرہم میں گھر پر تھے جب 17 اکتوبر کی شام کو ’نقاب پوش‘ چوروں نے توڑ پھوڑ کی اور قیمتی سامان لے گئے۔

ڈرہم پولیس نے بتایا کہ ایک 32 سالہ شخص کو چوری کے شبہ میں گرفتار کیا گیا ہے۔

جب یہ واقعہ پیش آیا تو سٹوکس ٹیسٹ سیریز کے لیے پاکستان میں تھے۔

انہوں نے کہا کہ چوری ہونے والی اشیا میں ایک تمغہ بھی شامل ہے جو انہیں انگلینڈ کو ورلڈ کپ جتوانے کی وجہ 2020 کے نئے سال کی اعزازی فہرست میں ملا تھا۔

اپنے ذاتی ایکس اکاؤنٹ پر چوری کی وضاحت کرتے ہوئے سٹوکس نے اپنے گھر سے لی گئی چیزوں کی تصاویر پوسٹ کیں جن میں کرسچن ڈائر ہینڈ بیگ، انگلینڈ کرکٹ کا بیج، سونے کی انگوٹھی اور بریسلیٹ شامل تھے۔

انہوں نے لکھا کہ ’اس جرم کے بارے میں اب تک کی سب سے بری بات یہ ہے کہ یہ اس وقت کیا گیا جب میری بیوی اور دو چھوٹے بچے گھر میں تھے۔‘

’شکر ہے میرے خاندان میں سے کسی کو بھی کوئی جسمانی نقصان نہیں پہنچا۔ تاہم، اس تجربے کا اثر ان کی جذباتی اور ذہنی حالت پر پڑا ہے۔‘

بین سٹوکس نے کہا کہ ’ہم صرف اس کے بارے میں سوچ سکتے ہیں کہ یہ صورتحال کتنی خراب ہوسکتی تھی۔‘

انگلینڈ کو پاکستان میں ٹیسٹ سیریز میں 2-1 سے شکست کا سامنا کرنا پڑا۔