ریاض سے باہر ’پولارس نارتھ‘ کیمپ جہاں فطرت کے نظارے ہیں

ریاض شہر کی مصروف زندگی سے دور پرسکون ماحول میں فطرت کے نظاروں سے لطف اندوز ہونے کے لیے پولارس نارتھ کیمپ بہترین مقام ہے۔

عرب نیوز کے مطابق ہائیکنگ میں دلچسپی رکھنے والے زائرین اور خاص طور پر فطرت کی نزدیک سے جاننے کے شوقین افراد کو یادگار آؤٹ ڈور تجربہ فراہم کرتا ہے۔

پولارس نارتھ کیمپ کے لیے آنے والوں کو ریاض سے باہر الثمامہ کے علاقے میں قائم کنگ خالد رائل ریزرو  لے جاتا ہے جہاں وہ خوبصورت قدرتی مناظر اور جنگلی حیات کا نظارہ کر سکتے ہیں۔

پولارس نارتھ کے پہلے ایڈونچر پیکج کو ’پولارس ہائیک‘ کا نام دیا گیا ہے جس میں شامل گروپ کو مختلف راستوں پر ہائیکنگ کرائی جاتی ہے۔

گذشتہ 50 سال سے محفوظ پہاڑی راستوں اور وادیوں سے گزرنے کا یہ سفر تجربہ کار مقامی گائیڈز کے ساتھ کرایا جاتا ہے۔

مقامی گائیڈز اس تمام سفر کے دوران علاقے کی تاریخ اور جنگلی حیات کے بارے میں دلچسپ معلومات بھی فراہم کرتے ہیں۔

ہائیکنگ گروپ میں شامل افراد کو چاق و چوبند رہنے کے لیے تازہ پھل اور پانی فراہم کیا جاتا ہے۔

اس کے علاوہ پولارس نارتھ کیمپ میں مختلف قسم کے کھیل اور دیگر سرگرمیاں بھی رکھی گئی ہیں جو مخصوص لمحات کو مزید یادگار بناتی ہیں۔

پرسکون اور آرام دہ وقت گزارنے کے لیے پولارس نارتھ کیمپ ایک بہترین مقام ہے جہاں خوبصورت نظاروں کے علاوہ انڈور تفریحات بھی موجود ہیں۔

یہاں کھلی فضا میں بیٹھ کر سردیوں کی دھوپ  کا سکون بھی حاصل کیا جا سکتا ہے۔

پولارس نارتھ میں روایتی عربی ثقافت کو مدنظر رکھتے ہوئے ایک خوبصورت بڑا خیمہ ’بیت الشعار‘ بھی موجود ہے جو  آرم دہ اور پرسکون ماحول فراہم کرتا ہے۔

زائرین کے خاص پیکج بھی دستیاب ہے جس میں ایک بڑی سکرین پر فلم دیکھنے کا بھی انتظام ہے، مختلف قسم کے کھیلوں کے علاوہ آگ کے گرد بیٹھ کر گرم مشروبات سے لطف اندوز ہونے کی سہولت بھی دستیاب ہے۔

پولارس نارتھ کیمپ سے لطف اندوز ہونے کے لیے مختلف کیٹیگریز کے ٹکٹ رکھے گئے ہیں جو150 سے 865 ریال تک دستیاب ہیں۔

اگر آپ ایڈونچر کے شوقین ہیں، پُرسکون ماحول یا پُرتعیش تفریح چاہتے ہیں تو آپ کے لیے پولارس نارتھ میں سب کچھ موجود ہے۔