لائیو: سعودی عرب کی سالمیت پر پاکستان کبھی آنچ نہیں آنے دے گا، وزیراعظم

اہم نکات:

• تحریک انصاف کا شیر افضل مروت کو پارٹی سے نکالنے کا فیصلہ

• پاکستان سعودی عرب کی سالمیت پر آنچ نہیں آنے دے گا، وزیراعظم

• آئی ایم ایف کا مالیاتی نظم و ضبط اور موثر گورننس کی اہمیت پر زور

• آئی سی سی چیمپئنز ٹرافی کے لیے افغانستان کرکٹ ٹیم کی لاہور آمد

• ملک کے بیشتر علاقوں میں موسم سرد اور خشک رہنے کا امکان

عمران خان کی شیر افضل مروت کو پارٹی سے نکالنے کی ہدایت

پاکستان تحریک انصاف کے بانی (پی ٹی آئی) عمران خان نے رکن قومی اسمبلی شیر افضل مروت کو پارٹی سے نکالنے کی ہدایات جاری کر دی ہیں۔

بدھ کے روز عمران خان نے اڈیالہ جیل میں پارٹی رہنماؤں سے ملاقات کے دوران گفتگو میں کہا ہے کہ شیر افضل مروت کے خلاف شکایات کو مد نظر رکھتے ہوئے اُن کی پارٹی رکنیت ختم کرنے کا فیصلہ کیا ہے۔

پی ٹی آئی کے ترجمان شیخ وقاص اکرم نے بھی تصدیق کی ہے کہ عمران خان کی جانب سے شیر افضل مروت کو پارٹی سے نکالنے کی ہدایات دی ہیں۔

مزید تفصیل کے لیے یہاں کلک کریں

وزیراعظم کی سربراہی میں آئی ایم ایف سے ’تعمیری اور مثبت ملاقات ہوئی‘

پاکستان کے وزیر خزانہ محمد اورنگزیب نے کہا ہے کہ دبئی میں آئی ایم ایف کی منیجنگ ڈائریکٹر کرسٹالینا جارجیوا کے ساتھ تعمیری اور مثبت ملاقات ہوئی ہے۔

بدھ کو کراچی میں سکیورٹیز اینڈ ایکسچینج کمیشن کے زیراہتمام کے ایک تقریب سے ویڈیو لنک کے ذریعے خطاب میں وزیر خزانہ محمد اورنگزیب نے کہا کہ آئی ایم ایف نے پاکستان میں میکرو اکنامک استحکام کے حوالے سے مثبت فیڈ بیک دیا۔

منگل کو دبئی میں وزیراعظم شہباز شریف اور آئی ایم ایف کی منیجنگ ڈائریکٹر کرسٹالینا جارجیوا کی ملاقات ہوئی۔

وزیر خزانہ نے کہا کہ ملاقات میں پاکستان کی معاشی ترقی اور اصلاحات سے متعلق تفصیلی گفتگو ہوئی اور آئی ایم ایف نے پروگرام سے متعلق پاکستان کی کوششوں کر سراہا۔

سعودی عرب کی سالمیت پر پاکستان کبھی آنچ نہیں آنے دے گا: وزیر اعظم

وزیراعظم شہباز شریف نے کہا ہے کہ سعودی عرب کی خودمختاری اور جغرافیائی سالمیت پر پاکستان کبھی آنچ نہیں آنے دے گا۔

بدھ کو وفاقی کابینہ کے اجلاس سے خطاب کرتے ہوئے وزیراعظم شہباز شریف نے کہا کہ سعودی عرب برادر ملک اور بااعتماد ساتھی ہے۔

وزیراعظم نے کہا کہ دورۂ دبئی متحدہ عرب امارات کے صدر محمد بن زاید النہیان سے دو طرفہ تعلقات اور سرمایہ کاری سے متعلق گفتگو ہوئی۔

انہوں نے کہا کہ اس ملاقات میں آرمی چیف جنرل عاصم منیر بھی موجود تھے۔

پاکستان اور بنگلہ دیش کا مسافر اور کارگو شپنگ سروسز شروع کرنے کا فیصلہ

پاکستان نیشنل شپنگ کارپوریشن (پی این ایس سی) نے کہا ہے کہ اسلام آباد اور ڈھاکہ نے دونوں ممالک کے درمیان مسافر اور کارگو شپنگ سروسز شروع کرنے کا فیصلہ کیا ہے۔

منگل کو یہ بیان بنگلہ دیش کے ہائی کمشنر اقبال حسین خان اور پی این ایس سی کے چیئرمین سلطان احمد چاؤلہ کے درمیان ہونے والی ملاقات کے بعد سامنے آیا۔

جنوری میں، پاکستان اور بنگلہ دیش نے مشترکہ بزنس کونسل کے قیام کے لیے ایک تاریخی معاہدے پر دستخط کیے تھے۔

یہ پیشرفت دونوں ممالک کے اعلٰی حکام کے درمیان بات چیت کے بعد ہوئی ہے۔

ہراسانی کے مقدمات کا ’ہنگامی ٹرائل‘، لاہور میں ایک ہزار متاثرہ خواتین سیشن عدالت طلب

رائے شاہنواز، اردو نیوز لاہور

پاکستان کے صوبہ پنجاب کے دارالحکومت لاہور میں سیشن عدالتوں نے مختصر وقت میں ایک ہزار سے زائد خواتین کو طلب کیا ہے جنہوں نے ہراسانی کے مقدمات درج کروا رکھے تھے۔

پراسیکیوشن ڈیپارٹمنٹ نے خواتین پر گھریلو تشدد اور سرِ بازار ہراساں کرنے کے درج مقدمات میں سے اکثریت کیسز کی تفتیش مکمل کر کے چالان عدالتوں میں جمع کروائے ہیں۔

پاکستان کے رائج قوانین کے مطابق چالان جمع ہونے کے بعد سب سے پہلے عدالت مدعی کا بیان ریکارڈ کرتی ہے۔ ایک ہزار سے زائد چالان اکھٹے آنے پر عدالتوں نے تمام مدعی خواتین کو نوٹس جاری کر دیے ہیں۔

مزید تفصیل کے لیے یہاں کلک کریں

پیکا ایکٹ کے خلاف کوئٹہ میں پریس کلب کے باہر علامتی بھوک ہڑتالی کیمپ قائم

بلوچستان یونین آف جرنلسٹس (بی یو جے) نے پیکا ایکٹ کے خلاف کوئٹہ میں پریس کلب کے باہر علامتی بھوک ہڑتالی کیمپ قائم کر دیا ہے۔

اردو نیوز کے نامہ نگار زین الدین احمد کے مطابق علامتی بھوک ہڑتالی کیمپ پاکستان فیڈرل یونین آف جرنلسٹس کی کال پر قائم کیا گیا ہے۔

بلوچستان یونین آف جرنلسٹس نے کہا ہے کہ متنازع ایکٹ کے ذریعے صحافیوں کو آئینی حقوق سے محروم کیا جا رہا ہے۔

آزادی اظہار رائے پر قدغن کی کوئی کوشش کامیاب نہیں ہونے دیں گے اور عوام تک سچ کی رسائی یقینی بنانے کے لیے اقدامات کیے جائیں گے۔‘

انسانی سمگلنگ میں ملوث تین سمگلرز پنجاب سے گرفتار، ایف آئی اے

وفاقی تحقیقاتی ادارے (ایف آئی اے) نے سمندر کے راستے شہریوں کو یورپ بھجوانے میں ملوث دو انسانی سمگلرز سمیت تین ملزمان کو گرفتار کر لیا ہے۔

ایف آئی اے کے مطابق ملزمان شہریوں کو بیرون ملک اغوا اور ان پر تشدد کرنے میں بھی ملوث پائے گئے ہیں۔

ملزمان کو چھاپہ مار کارروائیوں میں منڈی بہاؤالدین اور گجرات کے مختلف علاقوں سے گرفتار کیا گیا ہے۔

ڈائریکٹر گجرانوالہ زون عبدالقادر قمر نے کہا کہ انسانی سمگلنگ میں ملوث عناصر کے خلاف کریک ڈاؤن جاری ہے۔ ’گرفتار انسانی سمگلروں کو قانون کے مطابق سخت سزائیں دلوائی جائیں گی۔‘

پنجاب صفائی مہم، ’پیٹ خالی اور حکومت پر بازار خوبصورت بنانے کا شوق سوار‘

رائے شاہنواز، اردو نیوز لاہور

پاکستان کے صوبہ پنجاب کے بڑے شہروں میں ان دنوں ایک بدلاؤ سا دکھائی دیتا ہے۔ پہلے سے بہتر صفائی اور کُھلے بازار دیکھنے والوں کو ایک مختلف احساس دلاتے ہیں۔ 

مزید تفصیل کے لیے یہاں کلک کریں

وزیراعظم کا عالمی ایٹمی توانائی ایجنسی کے ساتھ تعاون کو مضبوط بنانے کا عزم

وزیراعظم شہباز شریف سے عالمی ایٹمی توانائی ایجنسی (آئی اے ای اے)  کے ڈائریکٹر جنرل رافیل ماریانو گروسی نے ملاقات کی ہے۔

انٹرنیشنل اٹامک انرجی ایجنسی (آئی اے ای اے) کے سربراہ رافیل ماریانو گروسی پاکستان کے دو روزہ سرکاری دورے پر ہیں۔

وزیراعظم شہباز شریف نے پائیدار ترقی کے لیے جوہری ٹیکنالوجی سے فائدہ اٹھانے کے لیے پاکستان کے عزم کا اعادہ کیا۔

ملاقات کے دوران کینسر کی تشخیص، علاج، زراعت، غذائی تحفظ، پانی کے انتظام اور صنعت سمیت مختلف شعبوں میں جوہری ٹیکنالوجی کے پُرامن استعمال پر تبادلہ خیال کیا گیا۔

بلوچستان میں سکیورٹی فورسز پر نامعلوم مسلح افراد کا حملہ، دو اہلکار جان سے گئے

زین الدین احمد، اردو نیوز کوئٹہ

بلوچستان کے ضلع کیچ میں سکیورٹی فورسز پر نامعلوم مسلح افراد کے حملے میں دو اہلکار جان سے گئے۔

پولیس کے مطابق واقعہ تربت سے تقریباً 70 کلومیٹر دور تمپ میں منگل کی رات کو اس وقت پیش آیا جب ایف سی اہلکار گشت کر رہے تھے۔ 

نامعلوم مسلح افراد نے اندھا دھند فائرنگ کی اور راکٹ کے گولے بھی داغے جس کی زد میں آکر تین اہلکار شدید زخمی ہوئے جن میں سے دو اہلکار سپاہی صدام اور سپاہی سمیع بعد ازاں دم توڑ گئے۔

31 جنوری کو بلوچستان کے ضلع قلات میں دہشت گردوں کے ساتھ لڑائی میں 18 فوجی اہلکار جان سے گئے، جبکہ 12 شدت پسند ہلاک ہوئے تھے۔

اسلام آباد سمیت ملک کے بیشتر حصوں میں موسم سرد اور خشک رہے گا

محکمہ موسمیات کے مطابق آئندہ 12 گھنٹے کے دوران ملک کے بیشتر علاقوں میں موسم سرد اور خشک  رہنے کا امکان ہے۔

 اسلام آباد اور گردونواح، خیبر پختونخوا، پنجاب، سندھ اور بلوچستان میں  موسم سرد اور خشک رہے گا۔

 تاہم گلگت بلتستان اور کشمیر سمیت چند مقامات پر ہلکی بارش اور ہلکی برفباری کا امکان ہے۔

آئی سی سی چیمپئنز ٹرافی: افغانستان کی کرکٹ ٹیم لاہور پہنچ گئی

افغانستان کی کرکٹ ٹیم آئی سی سی چیمپئنز ٹرافی 2025 کے لیے لاہور پہنچ گئی ہے۔

افغانستان کی ٹیم پہلی بار آئی سی سی چیمپئینز ٹرافی میں حصہ لے رہی ہے۔

ٹیم کی قیادت حشمت اللہ شاہدی کر رہے ہیں۔ افغانستان کا پہلا میچ 21 فروری کو جنوبی افریقہ کے خلاف کراچی میں ہوگا۔

آئی سی سی چیمپئنز ٹرافی کا آغاز 19 فروری سے ہو گا۔ ایونٹ کے پہلے میچ میں پاکستان اور نیوزی لینڈ کی ٹیمیں کراچی میں آمنے سامنے آئیں گی۔

اس ایونٹ میں میزبان پاکستان کے علاوہ آسٹریلیا، جنوبی افریقہ، انڈیا، بنگلہ دیش، انگلینڈ، نیوزی لینڈ اور افغانستان کی ٹیمیں شامل ہیں۔

آئی ایم ایف کی منیجنگ ڈائریکٹر کی وزیراعظم سے ملاقات، ’مؤثر گورننس‘ پر زور

عالمی مالیاتی فنڈ (آئی ایم ایف) کی منیجنگ ڈائریکٹر کرسٹالینا جارجیوا نے وزیراعظم شہباز شریف سے ملاقات کی اور طویل مدتی معاشی استحکام کو یقینی بنانے کے لیے مسلسل مالیاتی نظم و ضبط، ادارہ جاتی اصلاحات اور موثر گورننس کی اہمیت پر زور دیا۔

وزیراعظم کے دفتر سے جاری بیان کے مطابق وزیراعظم شہباز شریف اور عالمی مالیاتی فنڈ کی منیجنگ ڈائریکٹر کرسٹالینا جارجیوا کی منگل کو ورلڈ گورنمنٹس سمٹ  2025 کے موقع پر دبئی میں ملاقات ہوئی۔

وزیراعظم نے آئی ایم ایف منیجنگ ڈائریکٹر کرسٹالینا جارجیوا کو پاکستان کے معاشی استحکام کے لائحہ عمل، مؤثر کارکردگی اور منصوبہ بندی کی پائیداری کے لیے حکومت کے عزم کا یقین دلایا۔

اس موقع پر کرسٹالینا جارجیوا نے آئی ایم ایف کے تعاون سے چلنے والے پروگرام کو مؤثر طریقے سے نافذ کرنے میں حکومتِ پاکستان کی کوششوں کو سراہا۔