’طبی سہولیات کا نیا دور‘، مریم نواز نے لاہور میں سعودی جرمن ہسپتال کا سنگ بنیاد رکھ دیا
پاکستان کے صوبہ پنجاب کی وزیراعلٰی مریم نواز نے لاہور سمارٹ سٹی میں سٹیٹ آف دی آرٹ سعودی جرمن ہسپتال کا سنگ بنیاد رکھا ہے۔
منگل کو اس تقریب میں وزیراعلٰی مریم نواز کے ہمراہ بترجی گروپ کے سربراہ صبحی بترجی بھی موجود تھے۔
وزیراعلٰی آفس سے جاری ایک بیان میں کہا گیا ہے کہ ’ایک بین الاقوامی ہسپتال سے صوبے میں جدید طبی سہولیات کے نئے دور کا آغاز کر دیا گیا ہے۔‘
لاہور بتر جی میڈیکل سٹی میں مجموعی طور پر 500 بیڈز ہوں گے، تاہم سعودی جرمن ہسپتال لاہور 300 بیڈز پر مشتمل ہوگا۔
سعودی جرمن ہسپتال دنیا بھر میں جدید طبی ٹیکنالوجی اور معیاری علاج کی خدمات کے لیے نمایاں مقام رکھتا ہے۔
سعودی جرمن ہسپتال لاہور سمیت پنجاب بھر کے عوام کو اعلٰی معیار کی جدید طبی سہولیات فراہم کرے گا۔ ہسپتال کو جدید میڈیکل ٹیکنالوجی اور بین الاقوامی معیار کی سہولتوں سے آراستہ کیا جائے گا۔
لاہور سمارٹ سٹی میں قائم ہونے والے سعودی جرمن ہسپتال سے نوجوانوں کو روزگار کے نئے مواقع میسر ہوں گے۔
سعودی جرمن ہسپتال نیٹ ورک سعودی عرب، متحدہ عرب امارات، مصر، مراکش، اور یمن میں کامیابی سے خدمات فراہم کر رہا ہے۔
اس موقع پر وزیراعلٰی پنجاب مریم نواز کا کہنا تھا کہ پنجاب میں ہیلتھ سسٹم میں بہتری کے لیے نجی شعبے کا خیر مقدم کریں گے۔ ’پنجاب کا پورا ہیلتھ سسٹم بدلنا اور بہتر کرنا چاہتی ہوں۔‘
انہوں نے کہا کہ نیا ہسپتال صحت عامہ میں بہتری اور فلاحی معاشرے کے قیام کے لیے سنگ میل ثابت ہوگا۔
