شیخ محمد بن زاید نے 1295 قیدیوں کی رہائی کا حکم جاری کردیا
جمعرات 27 فروری 2025 15:03
’قیدیوں کی سزاؤں کے تحت واجب الادا مالی ذمہ داریوں کو بھی ادا کرنے کا اعلان کیا جائے گا‘ ( فوٹو: وام)
متحدہ عرب امارات کے صدر شیخ محمد بن زاید آل نہیان نے ملک بھر کے اصلاحی اداروں سے 1295 قیدیوں کی رہائی کا حکم جاری کیا ہے۔
اماراتی سرکاری نیوز ایجنسی’وام‘ کے مطابق شیخ محمد بن زاید نے قیدیوں کی سزاؤں کے تحت واجب الادا مالی ذمہ داریوں کو بھی ادا کرنے کا اعلان کیا ہے جو رمضان المبارک کے موقع پر خصوصی انسان دوست اقدام ہے۔
یہ اقدام امارات کے صدر کے اس عزم کی عکاسی کرتا ہے کہ قیدیوں کو نئی زندگی کا موقع دیا جائے، ان کے اہل خانہ کی مشکلات کم کی جائیں اور ان کے گھروں اور معاشرے میں استحکام کو فروغ دیا جائے۔
اس فیصلے کا مقصد قیدیوں کے اہل خانہ کو خوشی دینا اور انہیں اس بابرکت مہینے میں ایک نئی امید فراہم کرنا ہے۔
