لائیو: پاکستان اور بنگلہ دیش کا اقتصادی اور سرمایہ کاری کے شعبوں میں تعاون بڑھانے کا عزم

اہم نکات:

• پاکستان اور افغانستان کی سرحد پر فائر بندی اور طورخم بارڈر کھولنے پر اتفاق

• آئی ٹی کمپنیوں کو تمام سہولیات فراہم کی جا رہی ہیں، وزیراعظم

• ملک بھر میں بحریہ ٹاؤن کی متعدد عمارتیں سیل، اکاؤنٹس منجمند 

• قومی سلامتی کا ان کیمرہ اجلاس، پارلیمنٹ میں غیر معمولی سکیورٹی انتظامات

• اپوزیشن جماعتوں کا اتحاد، مولانا فضل الرحمان سے معاملات طے: شیخ وقاص

پاکستان اور بنگلہ دیش کا اقتصادی اور سرمایہ کاری کے شعبوں میں تعاون بڑھانے کا عزم

پاکستان اور بنگلہ دیش نے دو طرفہ تعلقات کو مزید مستحکم کرنے کے عزم کا اعادہ کیا ہے۔

سرکاری نیوز چینل پی ٹی وی کے مطابق جنیوا میں وفاقی وزیر سمندر پار پاکستانی چوہدری سالک حسین اور بنگلہ دیش کے وزارت لیبر اینڈ ایمپلائمنٹ کے مشیر بریگیڈیئر جنرل (ر) ڈاکٹر محمد سخاوت حسین کے درمیان ملاقات ہوئی۔

ملاقات میں اقتصادی، تجارتی اور سرمایہ کاری کے شعبوں میں تعاون بڑھانے، عوامی سطح پر روابط کو مضبوط کرنے کے لیے ثقافتی اور تعلیمی تبادلوں کے فروغ، پارلیمانی اور ادارہ جاتی تعلقات کو بڑھانے پر گفتگو ہوئی۔

وفاقی وزیر چوہدری سالک حسین نے پاکستان اور بنگلہ دیش کے درمیان تاریخی، ثقافتی، اور مذہبی تعلقات کو اجاگر کرتے ہوئے اس بات پر زور دیا کہ ان روابط کو مزید مضبوط بنانے کے لیے مشترکہ اقدامات کی ضرورت ہے۔

جرگہ مذاکرات، پاکستان اور افغانستان کی سرحد پر فائر بندی اور طورخم بارڈر کھولنے پر اتفاق

پاکستان اور افغانستان کے جرگہ مشران کے درمیان گذشتہ ہفتے پاکستانی جرگے کی جانب سے رکھی گئی تین شرائط پر بحث مباحثہ ہوا جس میں دونوں اطراف سے فائر بندی، امن برقرار رکھنے اور طورخم بارڈر کھولنے پر اتفاق ہوا۔

جرگہ مشران کی طرف سے جاری اعلامیے کے مطابق قومی مشران اور چیمبرز مشران جرگہ کی طورخم بارڈر کے حوالے سے افغانستان میں طورخم گمرک میں آج دوسری نشست ہوئی۔

 افغان قومی جرگے نے متنازعہ حدود میں تعمیراتی کام بند کرنے کے حوالے سے متعلقہ حکام سے بات چیت کے لیے پاکستان قومی جرگہ سے شام تک کا وقت مانگ لیا۔

ملک بھر میں بحریہ ٹاؤن کی متعدد عمارتیں سیل، اکاؤنٹس منجمند 

قومی احتساب بیورو (نیب) نے کہا ہے کہ ملک بھر میں بحریہ ٹاؤن کی متعدد عمارتیں سیل، گاڑیاں ضبط اور اکاؤنٹس منجمند کیے گئے ہیں۔

پیر کو نیب کی طرف سے جاری پریس ریلیز کے مطابق ’حالیہ کارروایئوں میں بحریہ ٹاؤن کی کراچی، لاہور، تخت پڑی، نیو مری (گالف سٹی) اور اسلام آباد میں موجود لاتعداد کمرشل اور رہائشی جائیدادوں کو سربمہر کر دیا گیا ہے۔ اور سینکڑوں بنک اکاؤنٹس اور گاڑیوں کو بھی منجمد کر دیا گیا ہے۔‘

مزید کہا گیا کہ بحریہ ٹاؤن کے مالک ملک ریاض احمد اور دیگر افراد کے خلاف نیب نے اسلام آباد اور کراچی کی احتساب عدالتوں میں ان ملزمان کے خلاف کئی ریفرنسز دائر کر دیے ہیں اور مذکورہ عدالتوں نے تمام ملزمان کو طلب کر لیا ہے۔

آئی ٹی کمپنیوں کو تمام سہولیات فراہم کی جا رہی ہیں، وزیراعظم

وزیراعظم شہباز شریف نے کہا ہے کہ پاکستان میں 25 ارب ڈالر کی برآمدات کے ہدف کے حصول کے لیے آئی ٹی کمپنیوں کو تمام سہولیات فراہم کی جا رہی ہیں۔

پیر کو وزیراعظم کے دفتر سے جاری پریس ریلیز کے مطابق وہ معروف امریکی ملٹی نیشنل آئی ٹی کمپنی ایفینٹی کے وفد سے گفتگو کررہے تھے۔

وزیراعظم نے ایفینٹی کے پاکستان کے آئی ٹی شعبے میں مزید سرمایہ کاری میں دلچسپی کا خیر مقدم کرتے ہوئے کہا کہ آئی ٹی شعبے کی باصلاحیت افرادی قوت میں عالمی مارکیٹ میں مسابقتی بنیاد پر کام کرنے کی استعداد موجود ہے۔

ان کا کہنا تھا کہ ملک کے باصلاحیت نوجوانوں کو آئی ٹی، اے آئی اور دیگر جدید تکنیکی صلاحیتوں سے لیس کرنے کے پروگرام کی خود نگرانی کر رہا ہوں۔

قومی سلامتی کا ان کیمرہ اجلاس، پارلیمنٹ میں غیر معمولی سکیورٹی انتظامات

ترجمان قومی اسمبلی کا کہنا ہے کہ قومی اسمبلی میں ہونے والے قومی سلامتی کے ان کیمرہ اجلاس کے موقع پر سکیورٹی کے سخت اور غیر معمولی انتظامات کیے گئے ہیں۔

ایک بیان میں انہوں نے کہا کہ کسی بھی غیر متعلقہ فرد کا داخلہ ممنوع قرار دے دیا گیا ہے، جبکہ میڈیا سمیت تمام انٹری کارڈز کو عارضی طور پر غیر مؤثر کر دیا گیا ہے۔

ترجمان نے کہا کہ اجلاس کے دوران پارلیمنٹ کی حدود میں کسی بھی قسم کی عکس بندی، ویڈیو گرافی اور فوٹو گرافی پر مکمل پابندی عائد کر دی گئی ہے۔

اپوزیشن جماعتوں کا اتحاد، مولانا فضل الرحمان سے معاملات طے: شیخ وقاص اکرم

پی ٹی آئی کے رہنما شیخ وقاص اکرم نے اپوزیشن جماعتوں کے اتحاد کے حوالے سے کہا ہے کہ مولانا فضل الرحمان سے معاملات طے پا گئے ہیں اور صرف عمران خان سے ملاقات کا انتظار ہے۔

پیرکو پشاور میں پریس کانفرنس کرتے ہوئے کہا ہے کہ ’مولانا فضل الرحمان کے جو تحفظات تھے انھیں دور کرنے کی یقین کرائی گئی ہے۔‘

انہوں نے کہا کہ ’ہم چاہتے ہیں عید سے قبل اپوزیشن جماعتوں کا اتحاد بن جائے اور عید کے فورا بعد احتجاج شروع کریں۔‘

قومی اسمبلی میں کل ہونے والے ان کیمرہ میٹنگ کے بارے میں ان کا کہنا تھا کہ تحریک انصاف اس میں شرکت کرے گی۔

شیخ وقاص نے کہا کہ ’ملک کی سکیورٹی کا معاملہ ہے تو ان کیمرہ بریفنگ میں شرکت کریں گے۔‘

جعفر ایکسپریس حملہ، ’میرے استعفے سے معاملہ حل ہوتا ہے تو میں تیار ہوں‘

وزیر دفاع خواجہ آصف نے جعفر ایکسپریس واقعے پر اپوزیشن کی تنقید کا جواب دیتے ہوئے کہا ہے کہ ’اگر میرے استعفے سے معاملہ حل ہوتا ہے تو میں تیار ہوں۔‘

پیر کو پارلیمنٹ ہاؤس میں میڈیا نے سوال کیا کہ اپوزیشن سکیورٹی ناکامی کی ذمہ دار آپ کو قرار دے کر استعفے کا مطالبہ کر رہی ہے۔

واضح رہے کہ قومی اسمبلی کے گذشتہ اجلاس میں پی ٹی آئی کے رہنما اسد قیصر نے خواجہ آصف کی تقریر پر تنقید کرتے ہوئے کہا تھا کہ ’وزیر دفاع نے دہشت گردی کے حوالے سے لائحہ عمل دینے کے بجائے پی ٹی آئی پر تنقید کی، اگر ان میں تھوڑی سی بھی شرم ہوتی تو استعفیٰ دے دیتے۔‘

ریاستی اداروں کے خلاف ’نفرت انگیز مہم‘ چلانے والا ملزم بنی گالا سے گرفتار

ایف آئی اے کے سائبر کرائم سرکل اسلام آباد نے کارروائی کرتے ہوئے سوشل میڈیا پر ریاستی اداروں کے خلاف نفرت انگیز مہم چلانے والے ملزم کو بنی گالا اسلام آباد گرفتار کرلیا۔

ایف آئی اے کے مطابق گرفتار ملزم کی شناخت حیدر سعید کے نام سے ہوئی ہے۔ ملزم نے سانحہ جعفر ایکسپریس کے دوران اداروں کے خلاف منفی پروپیگنڈا اور تضحیک آمیز مواد شیئر کیا۔

مزید کہا گیا کہ ملزم سوشل میڈیا پر کالعدم دہشت گرد تنظیموں کی حمایت اور اس کی تشہیر کرنے میں بھی ملوث پایا گیا۔

سکیورٹی خدشات، جنوبی وزیرستان کے دونوں اضلاع میں کرفیو کا نفاذ

جنوبی وزیرستان کے دونوں اضلاع میں آج 17 مارچ سے کرفیو نافذ کرنے کا اعلان کیا گیا ہے جو صبح 6 سے شام 6 بجے تک رہے گا۔

ضلع ٹانک کے ڈپٹی کمشنر کی طرف سے جاری نوٹی فکیشن کے مطابق 17 مارچ 2025  کو ٹانک اور جنوبی وزیرستان کے مندرجہ ذیل علاقوں کوڑ قلعہ، منزئی، خرگئی، احمد وام اور جنڈولہ میں صبح 6 سے شام 6 بجے تک کرفیو نافذ رہے گا۔

مزید کہا گیا کہ اس دوران ان راستوں پر ہر قسم کی نقل و حرکت پر مکمل پابندی ہوگی۔ مسافروں سے درخواست ہے کہ متبادل راستے اختیار کریں۔ وانا براستہ گومل، گڑداوی ٹریفک کے لیے کھلا رہے گا۔

اوورسیز پاکستانیوں کے لیے خصوصی بینچ کے قیام اہم پیش رفت: چوہدری سالک حسین

وفاقی وزیر سمندر پار پاکستانی و ترقی انسانی وسائل چوہدری سالک حسین نے  کہا ہے کہ اسلام آباد ہائی کورٹ میں بیرون ملک مقیم پاکستانیوں کی جائیداد کے تنازعات کے قانونی حل کے لیے خصوصی بینچ کا قیام ایک اہم پیش رفت ہے۔

پیر کو وزارت سمندر پار پاکستانی و ترقی انسانی وسائل کی جانب سے جاری پریس ریلیز کے مطابق یہ اقدام بیرون ملک مقیم پاکستانیوں کے قانونی مسائل کے فوری اور موثر حل کو یقینی بنانے کی جانب ایک اہم قدم کی نمائندگی کرتا ہے۔

چوہدری سالک حسین نے کہا کہ خصوصی بینچ میں پیش کیے جانے والے مقدمات کو 90 دنوں کے اندر حل کیا جائے گا۔ جس سے بیرون ملک مقیم پاکستانیوں کو درپیش قانونی رکاوٹوں پر قابو پایا جا سکے گا۔

پارلیمانی کمیٹی برائے قومی سلامتی کا اجلاس منگل کو طلب

پاکستان کی قومی اسمبلی کے سپیکر ایاز صادق نے ملک میں دہشت گردی کے بڑھتے ہوئے واقعات کے تناظر میں پارلیمانی کمیٹی برائے قومی سلامتی کا ان کیمرا اجلاس منگل کو طلب کر لیا ہے۔

قومی اسمبلی سیکریٹریٹ کے مطابق اجلاس قومی اسمبلی کے سپیکر ایاز صادق نے وزیر اعظم محمد شہباز شریف کی ہدایت پر طلب کیا ہے۔

قومی اسمبلی ہال میں کل صبح 11 بجے طلب کیے گئے بند کمرے کے اجلاس میں عسکری قیادت ملک کی موجودہ سکیورٹی صورتحال پر پارلیمانی کمیٹی کو بریفنگ دے گی۔

اجلاس میں کابینہ کے اراکین سمیت پارلیمنٹ میں موجود تمام سیاسی جماعتوں کے پارلیمانی رہنما اور ان کے نامزد نمائندے شرکت کریں گے۔

سوشل میڈیا پر منفی پروپیگنڈے کا معاملہ، پی ٹی آئی کے 16 رہنما دوبارہ طلب

جے آئی ٹی نے منفی پروپیگنڈے میں ملوث ہونے کے الزام میں پی ٹی آئی کے 16 رہنماؤں کو کل دوبارہ طلب کر لیا ہے۔

سرکاری نیوز چینل پی ٹی وی کے مطابق ان افراد کو 18 مارچ  کو جے آئی ٹی کے سامنے پیش ہونے کے نوٹس جاری کیے گئے ہیں۔

جن 16 افراد کو جے آئی ٹی نے طلب کیا ہے ان میں سید فردوس شمیم نقوی، محمد خالد خورشید خان، میاں محمد اسلم اقبال، محمد  حماد اظہر شامل ہیں، ان کے علاوہ عون عباس، محمد شہباز شبیر ،وقاص اکرم اور تیمور سلیم خان بھی شامل ہیں۔

صبغت اللہ ورک، اظہر مشوانی، محمد نعمان افضل، جبران الیاس، سلمان رضا، ذلفی بخاری، موسیٰ ورک اور علی ملک کو بھی طلبی کا نوٹس جاری کیے گئے ہیں۔

غیرملکیوں اور افغان سٹیزن کارڈ ہولڈرز کو 31 مارچ تک ملک چھوڑنے کا حکم

افغان سٹیزن کارڈ ہولڈرز سمیت غیر قانونی طور پر مقیم غیر ملکیوں کو 31 مارچ تک ملک چھوڑنے کا حکم دیا گیا ہے۔

سرکاری نیوز چینل پی ٹی وی کے مطابق رضاکارانہ واپسی میں 15 دن باقی ہیں۔ اس دوران کسی سے بدسلوکی نہیں کی جائے گی۔ مقررہ تاریخ کے بعد متعلقہ افراد کے خلاف سخت قانونی کارروائی عمل میں لائی جائے گی۔

واضح رہے کہ 2023 میں پاکستان کی حکومت نے افغان شہریوں کو واپس افغانستان بھیجنے کا فیصلہ کیا تھا جس کے بعد ان کی مرحلہ وار واپسی کا سلسلہ جاری ہے۔

پاکستان اور نیوزی لینڈ کے درمیان دوسرا ٹی20 میچ کل

قومی سکواڈ کرائسٹ چرچ سے ڈونیڈن پہنچ گیا ہے اور پاکستان اور نیوزی لینڈ کے درمیان دوسرا ٹی20 میچ کل 18 مارچ کو ہوگا۔

پی سی بی کی طرف سے جاری بیان کے مطابق قومی ٹیم آج آرام کرے گی اور میچ مقامی وقت کے مطابق 2 بج کر 15 منٹ پر شروع ہوگا۔

نیوزی لینڈ نے پہلے ٹی20 میچ میں پاکستان میں 9 وکٹوں سے شکست دے دی تھی۔ اتوار کو کرائسٹ چرچ میں پہلے کھیلتے ہوئے پاکستان کی پوری ٹیم 91 رنز بنا کر آؤٹ ہو گئی تھی۔