اوورسیز پاکستانیوں کے لیے خصوصی بینچ قائم، ’مقدمات 90 دن میں حل ہوں گے‘

وفاقی وزیر برائے سمندر پار پاکستانیز اور انسانی وسائل چوہدری سالک حسین نے کہا ہے کہ بیرون ملک مقیم پاکستانیوں کو جائیداد سے متعلق درپیش مشکلات کے حل کے لیے اسلام آباد ہائیکورٹ میں خصوصی بینچ کا قیام ایک اہم پیشرفت ہے۔

پیر کو وفاقی وزیر برائے سمندر پار پاکستانیز چوہدری سالک حسین نے ایک بیان میں کہا ہے کہ یہ اقدام بیرون ملک مقیم پاکستانیوں کے قانونی مسائل کے فوری اور موثر حل کو یقینی بنانے کی جانب ایک اہم قدم کی نمائندگی کرتا ہے۔

’خصوصی بینچ کے قیام کا مقصد بیرون ملک مقیم پاکستانیوں کو درپیش مشکلات کو کم کرنا ہے، جنہیں اکثر بیرون مملک سے قانونی نظام میں رہنمائی حاصل کرنے میں چیلنجز کا سامنا کرنا پڑتا ہے۔‘

ان کا کہنا تھا کہ خصوصی بینچ کے قیام سے سے بیرون ملک مقیم پاکستانیوں کو درپیش قانونی رکاوٹوں پر قابو پایا جا سکے گا۔

’خصوصی بینچ میں پیش کیے جانے والے مقدمات کو 90 دنوں کے اندر حل کیا جائے گا۔ اس بات کو یقینی بنایا جائے گا کہ ایک تیز رفتار اور موثر عدالتی عمل بیرون ملک مقیم پاکستانیوں کے مفادات کا تحفظ کرے۔‘

ان کا کہنا تھا کہ وفاقی حکومت اور وزارت سمندر پار پاکستانی بیرون ملک مقیم پاکستانیوں کے مسائل کے حل کے لیے ہر ممکن اقدامات کرے گی۔