مشرف واپس آئیں، مکمل تحفظ دینگے، وزارت داخلہ
اسلام آباد...وزارتِ داخلہ نے سیکورٹی کےلئے لکھے گئے پرویز مشرف کے وکیل کے خط کا جواب دیتے ہوئے کہا ہے کہ سابق صدر کو وطن واسپی پر مکمل تحفظ دیا جائےگا۔ وزارتِ داخلہ نے پرویز مشرف کے وکیل کے خط کا جواب دیتے ہوئے کہا کہ سابق صدر کی پاکستان آمد کا مکمل شیڈول دیا جائے۔ وہ کب پاکستان واپس آنا چاہتے ہیں اور یہاں کتنے دن قیام کریں گے؟ اس حوالے سے تمام تفصیلات فراہم کی جائیں تا کہ فول پروف سیکیورٹی دینے کا انتظام کیا جائے۔سابق صدر کے وکیل اختر شاہ نے وزارتِ داخلہ کے خط کو مسترد کرتے ہوئے کہا کہ پرویز مشرف ہائی ویلیو ٹارگٹ ہیں۔ان کی سیکیورٹی سے متعلق عدالت میں یقین دہانی کرائی جائے۔ انہوںنے کہا کہ جو حکومت اپنی سیکیورٹی نہیں کر سکتی وہ ایک ہائی ویلیو ٹارگٹ کو کیسے سیکیورٹی فراہم کرےگی؟۔پرویز مشرف کے وکیل نے کہا کہ وزارتِ داخلہ عدالت میں پرویز مشرف کا سیکیورٹی پلان جمع کرائے۔ عدالت میں سیکیورٹی کی یقین دہانی پر سابق صدر آئندہ چار سے چھ ہفتوں میں پاکستان آ سکتے ہیں تاہم یقین نہیں کہ حکومت سیکیورٹی فراہم کریگی۔حکومت عدالت کو آگاہ کرے کہ وہ پرویز مشرف کو کیا سیکیورٹی فراہم کریگی؟۔
