اصغر خان کیس ،نواز شریف کی طلبی کا فیصلہ؟
اسلام آباد.... اصغر خان کیس میں سابق وزیراعظم نواز شریف کی طلبی کی تاریخ کا فیصلہ پیر کو کیا جائے گا۔ سابق آرمی چیف اسلم بیگ اور سابق ڈی جی آئی ایس آئی اسد درانی پیش ہوچکے ہیں۔ ذرائع کے مطابق اصغر خان کیس میں احسان صادق کی سربراہی میں کمیٹی تحقیقات کو آگے بڑھانے کے لئے طریقہ کار پر خصوصی پیپرز لکھ رہی ہے جسے 'اسٹریٹجک دستاویز' کا نام دیا گیا ہے۔یاد رہے کہ سپریم کورٹ نے گزشتہ ہفتے اپنے فیصلے میں حکومت کو اصغر خان کیس پر عملدرآمد کا حکم دیا تھا اور کہا تھا کہ وفاقی حکومت اور ایف آئی اے کیس کے فیصلے کی روشنی میں قانون کےمطابق کارروائی کریں۔اصغر خان کیس میں نامزد سابق آرمی چیف جنرل (ر) مرزا اسلم بیگ اور آئی ایس آئی کے سابق سربراہ لیفٹیننٹ جنرل (ر) اسد درانی ایف آئی اے کی تحقیقاتی کمیٹی سامنے پیش ہوئے تھے۔کیس میں نواز شریف سمیت دیگر بھی نامزد ہیں، جن کے بیانات تحقیقات کے اگلے مرحلے میں لئے جائیں گے۔مرزا اسلم بیگ اور اسد درانی نے سپریم کورٹ کے فیصلے کے خلاف سپریم کورٹ میں ہی نظرثانی اپیل دائر کر رکھی تھی جسے عدالت مسترد کرچکی ہے۔
