کانگریس کی اجازت کے بغیر کچھ نہیں کرسکتا، کمارسوامی
نئی دہلی۔۔۔۔کرناٹک میں کانگریس کی حمایت یافتہ مخلوط حکومت کی تشکیل کے پانچویں دن وزیر اعلیٰ ایچ ڈی کمار سوامی نے کہا کہ وہ کانگریس کے رحم و کرم پر ہیں۔ اس کی اجازت کے بغیر کچھ نہیں کرسکتا۔انہوں نے کرناٹک بھون میں صحافیوں سے بات چیت کرتے ہوئے کہا کہ ریاست میں ترقیاتی کاموں کیلئے ذمہ دار ضرور ہیں لیکن کانگریس کی وجہ سے ہی عہدے پر ہیں ۔ واضح ہو کہ کمار سوامی نے 23مئی کو کانگریس کی حمایت سے وزیر اعلیٰ کے عہدے کا حلف اٹھایا تھا جبکہ کانگریس کے جی پرمیشورن نائب وزیر اعلیٰ بنائے گئے۔ ابھی تک ریاستی کابینہ تشکیل نہیں دی جاسکی اور نہ ہی دونوں سیاسی جماعتوں کے وزراء کی تعداد اور محکموں کی تقسیم سے متعلق سوامی اور کانگریسی رہنماؤں کے اختلافات دور ہوسکے ۔
