علاءالدین مری بلوچستان کے نگراں وزیر اعلیٰ مقرر
اسلام آباد... الیکشن کمیشن نے علاء الدین مری کو بلوچستان کا نگراں وزیر اعلی مقرر کردیا۔ چیف الیکشن کمیشن کی سربراہی میں ہونے والے اجلاس میں فیصلہ کیا گیا۔ ایڈیشنل سیکریٹری اختر نذیر نے میڈیا سے گفتگو کرتے ہوئے بتایا کہ علاءالدین مری کا تعلق ضلع مستونگ سے ہے۔ یونیورسٹی آف بلوچستان سے گریجویشن کے بعد مفاد عامہ کے کاموں میں حصہ لینا شروع کیا۔ علاءالدین مری سابق بیوروکریٹ غلام محی الدین مری کے صاحبزادے ہیں۔ بنیادی طور پر تاجر ہیں اور تجارت میں وسیع تجربہ رکھنے کے باعث چیئرمین پاکستان یورپین بزنس کونسل ایف پی سی سی آئی کے عہدے پر بھی فائز رہے۔ کسی سیاسی جماعت سے کوئی وابستگی نہیں رہی ۔ بلوچستان میں حالیہ سینیٹ انتخابات میں آزاد حیثیت سے کھڑے ہوئے تھے۔ واضح رہے کہ حکومت بلوچستان کی جانب سے نگراں وزیر اعلیٰ کے لئے علاء الدین مری اور سردار پوپلزئی کا نام تجویز کیا گیا تھا۔ اپوزیشن نے سابق سفیر اشرف جہانگیر قاضی اور بلوچستان اسمبلی کے سابق اسپیکر اسلم بھوتانی کے نام تجویز کئے۔ الیکشن کمیشن نے متفقہ طور پر نگراں وزیر اعلیٰ بلوچستان مقرر کیا۔ بلوچستان میں نگراں وزیر اعلیٰ کے تقرر کے ساتھ چاروں صوبوں میں نگراں حکومتوں کا مرحلہ مکمل ہوگیا۔
