سمیرا ملک کی نااہلی ختم،الیکشن لڑنے کی اجازت
کراچی... سپریم کورٹ نے مسلم لیگ (ن) کی رہنما سمیرا ملک کی نااہلی کیخلاف اپیل منظور کرتے ہوئے الیکشن میں حصہ لینے کی اجازت دے دی ۔ سپریم کورٹ کراچی رجسٹری میں سابق رکن قومی اسمبلی سمیرا ملک کی نااہلی کے خلاف اپیل کی سماعت ہوئی۔ سمیرا ملک نے سپریم کورٹ سے الیکشن میں حصہ لینے اور کاغذات نامزدگی جمع کرانے کی اجازت دینے کی درخواست کی۔ سپریم کورٹ نے نظر ثانی کی درخواست منظور کرتے ہوئے نااہلی کو معطل کردیا اور عام انتخابات 2018 میں حصہ لینے کی اجازت دے دی۔چیف جسٹس ثاقب نثار نے ریمارکس د ئیے کہ فارنسک رپورٹ کے مطابق سمیرا ملک کی تصویر اصلی ہے۔تحقیق کے بغیر کیسے دستخط اور تصاویر کو جعلی کہہ سکتے ہیں۔اب تو جانچ کیلئے سائنسی طریقے موجود ہیں۔کسی عورت پر جعلسازی کا دھبہ نہیں لگنے دیں گے۔ سمیرا ملک نے 2008 میں خوشاب سے قومی اسمبلی کا الیکشن لڑا تھا۔ اکتوبر 2013 میں سپریم کورٹ نے جعلی ڈگری کیس میں بی اے کی ڈگری میں رد و بدل پر سمیرا ملک کو نااہل قرار دے دیا تھا۔دریں اثنا ءسمیرا ملک نے خوشاب سے ن لیگ کے ٹکٹ پر الیکشن لڑنے کا فیصلہ کیا ہے۔