شیخ رشید وزیر داخلہ بنے تو کون کون جیل جائے گا؟

اسلام آباد ...عوامی مسلم لیگ کے صدر شیخ رشید احمد نے کہا ہے کہ اس وقت سیاسی جماعتوں کی 67فیصد قیادت پر نیب کے کیسز ہیں۔تحریک انصاف اور ق لیگ کے اہم رہنماوں کےخلاف بھی نیب کے کیسز ہیں۔ٹی وی انٹرویومیں انہوں نے کہا کہ عمران خان کی جیت پاکستان کے غریب عوام کی جیت ہے ۔ عمران خان بڑے تیز ی سے اقدامات کر نیوالے ہیں۔ شاید اس کی وجہ یہ ہے کہ وہ فاسٹ بولر ہیں۔ انہوں نے کہا کہ بھٹو کے بعد اس قوم نے عمران خان پر اعتماد کیا ہے۔ اگر اب حالات بھٹو کے الیکشن کے بعد والے بنے تو اس ملک کے ساتھ بہت بر اہوگا۔انہوں نے کہا کہ آئندہ 72گھنٹے تک عمران خان اپنی کابینہ کا فیصلہ کرلیں گے۔ کرپشن کے سمندر میں عمران خان نے ثابت کرناہے اب کسی این آر او گنجائش نہیں ۔ نواز شریف کاخیال تھا کہ ان کے جیل جانے پر ہمالیہ روئے گا لیکن ایک ٹائر تک نہیں جلا۔ یہ مسلم لیگ ن کا مزاج ہے کہ میٹھا میٹھا ہپ ہپ اور کڑوا کڑوا تھو تھو ۔ انہوںنے کہا کہ اگر وزیر داخلہ بنا تو شہبازشریف ، شاہد خاقان عباسی اور سعد رفیق جیل میں ہونگے۔ منشیات فروشوں، چوروں اور جواریوں سے جیلیں بھر دوں گا ۔انہوں نے کہا کہ زندگی میں 8 مرتبہ وزیر رہا ہوں ۔ وزارت کا سوال کرنا اپنی توہین سمجھتا ہوں۔ میرا ٹارگٹ پورا ہوگیا جو عمران خان کو وزیر اعظم بنانا تھا۔چوروں کوکٹہرے میں کھڑا کرنا ہے ۔ چور اب کٹہرے میں کھڑے ہیں۔ انہوں نے کہاکہ قوم کی خدمت کے لئے کہیں بھی ذمہ داری سونپی گئی تو اسے پورا کروں گا۔پارلیمنٹ میں مضبوط اپوزیشن کے حوالے سے سوال پر انہوں نے کہا کہ ان کا سامنا کرلیں گے۔مولانا فضل الرحمن پہلی مرتبہ اپنے پیسے سے سیاست کرنے جارہے ہیں۔ انہوں نے کہا کہ عمران خان نے بعض جگہ ایسے امیدواروں کو ٹکٹ دیئے جن کی شہرت اچھی نہیں تھی اوریہ ٹھیک نہیں ہوا۔انہوں نے کہا کہ 200ارب رو پے کی کرپشن کے ایل این جی کے ثبوت میرے پاس ہیں۔ پاکستان میں چور ، ڈاکو اور لٹیرا سیاستدان ہے۔اس کونتھ صرف عمران خان ڈال سکتاہے۔انہوں نے کہا کہ اگر نئے پاکستان کی طرف جانا ہے تو دشمنیاں ختم کرنی ہیں اور لوگوں سے کہنا ہے کہ لوٹی ہوئی دولت واپس لے آو۔ انہوں نے کہا کہ بطور سینئر سیاستدان کہتا ہوں کہ اگر لوگوں نے اپنی شکستوں کو تسلیم نہ کیا تو اس نظام کوخطرہ لاحق ہو جائے گا۔

مزید پڑھیں: نئے این آر او کی افواہیں،تحریک انصاف نے تردید کردی