دو ارب ڈالر مل گئے، سعودی قیادت کا شکریہ: وزیراعظم شہباز شریف

پاکستان کے وزیراعظم شہباز شریف نے کہا ہے کہ آج ہمارے برادر ملک سعودی عرب نے دو ارب ڈالر سٹیٹ بینک میں جمع کرائے ہیں۔ ’جب میں نے اس کے بارے میں پشاور میں سنا تو ان کا دل کی عمیق گہرائیوں سے شکریہ ادا کیا۔‘

شہباز شریف نے منگل کو اسلام آباد میں ویمن امپاورمنٹ سے متعلق ایک تقریب سے خطاب کرتے ہوئے کہا کہ ’سعودی عرب ہمیشہ مشکل وقت میں ہماری مدد کرتا ہے۔‘

اس سے قبل وزیر خزانہ اسحاق ڈار کا کہنا تھا کہ ’برادر ملک سعودی عرب کی جانب سے دو ارب ڈالر سٹیٹ بینک آف پاکستان میں جمع کروا دیے گئے ہیں جو کریڈٹ ہو چکے ہیں۔‘

منگل کو ویڈیو پیغام میں وزیر خزانہ نے وزیراعظم شہباز شریف اور آرمی چیف عاصم منیر کی جانب سے سعودی قیادت بالخصوص شاہ سلمان اور ولی عہد شہزادہ محمد بن سلمان کا شکریہ ادا کرتے ہوئے کہا کہ وہ ہر موقع پر پاکستان کے ساتھ کھڑے رہے ہیں۔

وزیر خزانہ کا کہنا تھا کہ چند ہفتے قبل سعودی عرب نے سٹیٹ بینک میں اپنے دو ارب ڈالر جمع کرانے کا اعلان کیا تھا جو انہوں نے آج پورا کر دیا ہے۔

انہوں نے کہا کہ سعودی عرب کی جانب سے یہ رقم جمع کروانے پر پاکستان کے زرمبادلہ کے ذخائر میں اضافہ ہوگا۔

اسحاق ڈار نے بتایا کہ جمعے کو کلوزنگ کے وقت پاکستان کے ذخائر 10 ارب ڈالر سے کم یعنی 9.6-9.7 ارب ڈالر تھے جو اب 11.67 ارب ڈالر کے قریب ہو جائیں گے۔

انہوں نے کہا کہ سعودی عرب کی جانب سے دی گئی رقم آئندہ جمعے کو پاکستان کے زرمبادلہ کے ذخائر میں ظاہر ہوگی۔

خیال رے کہ مارچ میں بین الاقوامی مالیاتی فنڈ نے پاکستان سے مطالبہ کیا تھا کہ 1.1 ارب ڈالر کی قسط جاری ہونے سے پہلے وہ دوست ممالک اور ڈونر اداروں سے مالی معاونت کی یقین دہانی حاصل کرے۔

اسی سلسلے میں چین کی طرف سے پاکستان کو 2 ارب ڈالر کی رقم موصول ہوئی تھی جس کے بعد اب سعودی عرب نے 2 ارب ڈالر سٹیٹ بینک میں ڈیپازٹ کروائے ہیں، جبکہ متحدہ عرب امارات نے ایک ارب ڈلر کی مالی معاونت کا وعدہ کیا ہوا ہے۔

آئی ایم ایف کے ساتھ پچھلے معاہدے کی مدت پوری ہونے کے بعد گزشتہ ماہ 3 ارب ڈالر کے سٹاف لیول معاہدے پر دستخط ہوئے ہیں جو پاکستان کو معاشی بحران سے نکلالنے میں مددگار ثابت ہوگا۔

وزیراعظم شہباز شریف نے بھی اپنی ٹویٹ میں سعودی عرب کی قیادت اور عوام کا شکریہ ادا کرتے ہوئے کہا کہ مالی معاونت سے پاکستان کے زرمبادلہ کے ذخائر مضبوط ہوں گے۔  

وزیراعظم نے کہا ’میں اپنے بھائی ولی عہد اور وزیراعظم شہزادہ محمد بن سلمان کا خصوصی شکریہ ادا کرتا ہوں جنہوں نے پاکستان کے لیے مالی معاونت کو یقینی بنایا۔‘

’اس سے ظاہر ہوتا ہے کہ برادر ممالک اور بین الاقوامی کمیونٹی کو پاکستان کی اقتصادی بحالی پر یقین ہے۔ ہم پاکستان کی معیشت کو بہتر بنانے کی غرض سے تمام تر کوششیں کرنے کے لیے پرعزم ہیں۔‘

وزیراعظم شہباز شریف نے اس سلسلے میں وزیر خزانہ اسحاق ڈار اور آرمی چیف عاصم منیر کی قابل قدر کوششوں کو سراہتے ہوئے ان کا شکریہ ادا کیا۔

اس سے قبل وزیر خزانہ نے اپنے ویڈیو پیغام میں کہا تھا کہ آنے والے دنوں میں معیشت کے حوالے سے اچھی پیش رفت ہوگی جس سے ملک ترقی اور استحکام کی جانب گامزن ہوگا۔