اسلام آباد: پولیس ہیڈ کانسٹیبل راہزنی کی کوشش ناکام بناتے ہوئے بیٹے سمیت قتل
اتوار 17 دسمبر 2023 12:53
ہیڈ کانسٹیبل اور ان کے بیٹے کی نماز جنازہ پولیس لائنز ہیڈ کوارٹرز میں ادا کی گئی (فوٹو: سکرین گریب)
اسلام آباد کے تھانہ رمنا کے علاقہ میں پولیس کے ہیڈ کانسٹیبل محمد اشرف راہزنی کی کوشش ناکام بناتے ہوئے ڈاکوؤں کی فائرنگ سے اپنے بیٹے سمیت جان کی بازی ہار گئے۔
اتوار کو اسلام آباد پولیس نے سوشل میڈیا پلیٹ فارم ایکس پر ایک ٹویٹ میں بتایا کہ ’ہیڈ کانسٹیبل محمد اشرف تھانہ رمنا کی حدود جی 11 سے گزر رہے تھے اور انہوں نے راہزنوں کو واردات کرتے دیکھا۔ انہوں نے راہزنوں کو پکڑنے کی کوشش کی تو ملزمان نے فائرنگ کردی۔‘
بیان کے مطابق ’ان کا بیٹا ان کی مدد کو آیا تو وہ بھی راہزنوں کی فائرنگ کا نشانہ بن گیا۔ اس کے بعد دونوں زخموں کی تاب نہ لاتے ہوئے جان کی بازی ہار گئے۔‘
پولیس کے سینیئر افسران بھاری نفری کے ہمراہ موقع پر پہنچے اور ملزمان کی گرفتاری کے لیے علاقہ میں سرچ آپریشن کیا۔‘
آئی سی سی پی او ڈاکٹر اکبر ناصر خاں نے وقوعہ کا نوٹس لیتے ہوئے ملزمان کو جلد از جلد گرفتار کرنے کے احکامات جاری کیے۔
بعد ازاں ہیڈ کانسٹیبل اشرف اور ان کے بیٹے کی نماز جنازہ ادا کردی گئی۔ جنازہ پولیس لائنز ہیڈ کوارٹرز میں ادا کی گئی۔ نماز جنازہ میں پولیس، ضلعی انتظامیہ ،قانون نافذ کرنے والے اداروں کے افسران اور عوام نے شرکت کی۔
اسلام آباد میں ریکارڈ پولیس مقابلوں کے باوجود جرائم میں اضافہNode ID: 644606
