آبی تنازعہ پر پاک،ہند مذاکرات پھر ناکام

واشنگٹن ... عالمی بینک کی زیر نگرانی پاک و ہند کے آبی تنا زعہ پر مذاکرات پھر ناکام ہوگئے ۔ کسی ایک نکتے پر اتفاق رائے نہ ہوسکا۔ سندھ، طاس معاہدے کے تحت دونوں ملکوں میں سیکریٹری کی سطح پر مذاکرات 14 اور 15 ستمبر کو واشنگٹن میں ہوئے۔ کشن گنگا اور رتلے پن بجلی منصوبوں کے تکنیکی امور زیر بحث آئے۔مذاکرات کے بعد جاری اعلامیے میں عالمی بینک نے دونوں ملکوں کے مذاکرات کو سراہا اور سندھ طاس معاہدے کے تحفظ کا عزم کیا۔ بیان میں کہا گیا کہ عالمی بینک مکمل غیر جانبداری اور شفافیت کے ساتھ سندھ طاس معاہدے کے مطابق ذ مہ داری نبھانے کا عزم کئے ہوئے ہے۔ دوستانہ حل کے لئے دونوں ملکوں کے ساتھ مل کر کام کرتے رہیں گے۔واضح رہے کہ ہند سندھ طاس معاہدے کی خلاف ورزی کرتے ہوئے پاکستان کے حصے میں آنے والے دریاوں پر ڈیمز اور بجلی منصوبے تعمیر کررہا ہے۔