قیام امن کیلئے مثبت اشارے مل رہے ہیں ، اعزاز چوہدری

واشنگٹن... امریکہ میں پاکستان کے سفیر اعزاز  چوہدری نے کہا ہے کہ ظاہری طور پر پاکستان مستقبل میں افغان سیٹ اپ کا حصہ بننے کےلئے طالبان قیادت کی شمولیت پر زور دے رہا ہے۔ کابل اور واشنگٹن افغانستان سے عسکریت پسندی کو ختم کرنے کی کوششیں بڑھا رہے ہیں۔واشنگٹن میں خواتین کے خارجہ پالیسی گروپ کے ساتھ بات چیت کرتے ہوئے انہوں نے کہا کہ ہمارے پاس گلبدین حکمت یار کی مثال موجود ہے، جنہیں نہ صرف سیاسی سیٹ اپ میں جگہ دی گئی بلکہ ان کا نام اقوام متحدہ کی دہشت گردوں کی فہرست سے بھی نکال دیا گیا۔اس طرح کے انتظامات طالبان کےلئے بھی کئے جاسکتے ہیں۔انہوں نے کہا کہ اب بہت کچھ درست ہورہا ۔ اس پیشکش پر طالبان کی جانب سے غور کیا جارہا لیکن مذاکرات کی پیش کش کا کوئی جواب نہیں دیکھا جو حیران کن ہے۔ انہوں نے کہا کہ ا سلام آباد اور کابل مصالحت کےلئے ابتدائی اقدامات کررہے ہیں۔ ان اقدامات کی روشنی میں اب امن کے امکانات پہلے سے زیادہ روشن ہیں۔ ہر طرف سے مثبت اشارے مل رہے ہیں۔ ان کوششوں کا خیر مقدم کرتے ہیں۔انہوں نے کہا کہ پاکستان نے ہمیشہ افغانستان میں مذاکراتی عمل پر زور دیا کیونکہ وہ سمجھتا ہے کہ اس معاملے میں فوجی حل عمل نہیں کرے گا۔پاکستانی سفیر نے کہا کہ اس جنگ میں بہت خون بہہ چکا اور ہر سال 10 ہزار کے قریب لوگ قتل کرد ئیے جاتے، جسے اب روکنا ہوگا۔

مزید پڑھیں:دہشت گردوں کی پناہ گاہیں تباہ کردیں،فوجی ترجمان