چیریٹی میچ : ورلڈ الیون کو شکست،شاہد آفریدی کو گارڈ آف آنر
لندن: لارڈز کے میدان میں کھیلے گئے ٹی 20چیریٹی میچ میں ویسٹ انڈیز نے آندرے رسل اور سیمیول بدری کی عمدہ بولنگ کی بدولت ورلڈ الیون کے خلاف یکطرفہ مقابلے کے بعد 72رنز سے کامیابی حاصل کر لی۔200رنز کے تعاقب میں ورلڈ الیون 127رنز بنا سکی۔گزشتہ سال کیریبیئن جزائر میں ارما اور ماریہ نامی طوفان سے مقامی کرکٹ اسٹیڈیمز بری طرح متاثر ہوئے تھے اور انٹرنیشنل کرکٹ کونسل، انگلینڈ اینڈ ویلز کرکٹ بورڈ اور میلبورن کرکٹ کمیٹی نے سمندری طوفانوں سے تباہ ہونے والے 5 اسٹیڈیمز کی تعمیر نو کے لئے فنڈز اکٹھا کرنے کی غرض سے چیریٹی میچ کے انعقاد کا فیصلہ کیا تھا۔ اس یادگار میچ میں ورلڈ الیون کے کپتان شاہد آفریدی نے ٹاس جیت کر پہلے بیٹنگ کا فیصلہ کیا جوٹھیک ثابت نہ ہوا۔شاہد آفریدی اپنے ممکنہ طور پر آخری انٹرنیشنل میچ کیلئے میدان میں اترے تو ورلڈ الیون کے تمام کھلاڑیوں نے انہیں گارڈ آف آنر پیش کیا۔ایون لوئس کی جارحانہ بیٹنگ کی بدولت ویسٹ انڈین اوپنرز نے اپنی ٹیم کو 75رنز کا شاندار آغاز فراہم کیا اور اس شراکت کا خاتمہ افغان اسپنر راشد خان نے لوئس کو آوٹ کر کے کیا جنہوں نے 26 گیندوں پر 58رنز بنائے۔لوئس نصف سنچری بنانے پر مین آف دی میں میچ رہے۔ورلڈ الیون کو جلد ہی دو کامیابیاں اور ملیں جب شعیب ملک اور شاہد آفریدی نے بالترتیب کرس گیل اور آندرے فلیچر کی اننگز کا خاتمہ کیا۔اس کے بعد مارلن سیمیولز اور دنیش رامدین کی جوڑی وکٹ پر اکٹھی ہوئی اور دونوںنے 52رنز کی شراکت کر کے ٹیم کے بڑے اسکور کی راہ ہموار کی، سیمیولز 4 چھکوں کی مدد سے 43رنز بنا کر آوٹ ہوئے۔اختتامی اوورز میں رامدین اور آندرے رسل نے جارحانہ انداز اپنایا اور دونوں نے ناقابل شکست 47رنز کی شراکت قائم کر کے ویسٹ انڈیز کا اسکور 199 تک پہنچا دیا۔اننگز کے دوران فیلڈ میں کھلاڑیوں کے درمیان دلچسپ مناظر بھی دیکھنے کو ملے لیکن سب سے خاص بات مایہ ناز کمنٹیٹر اور انگلینڈ کے سابق کپتان ناصر حسین کیمرے اور مائیک کے ساتھ مختلف فیلڈنگ پوزیشنز پر موجودگی تھی جس نے شائقین کو محظوظ کیا۔200 رنز کے ہدف کے تعاقب میں ورلڈ الیون کی ٹیم کا آغاز تباہ کن تھا اور صرف 8 رنز پر اس کے 4 کھلاڑی پویلین لوٹ چکے تھے جن میں تمیم اقبال، لیونک رونچی، دنیش کارتھک اور سیم بلنگز شامل تھے۔ورلڈ الیون کی ٹیم ابتدائی نقصان کے بعد سنبھل نہ سکی اور تھسارا پریرا کی 61رنز کی اننگز کے باوجود پوری ٹیم 127رنز پر ڈھیر ہو گئی، شعیب ملک نے 12اور کپتان شاہد آفریدی نے 11رنز بنائے۔ ویسٹ انڈیز کے کیسرک ولیمز 3 وکٹیں لے کر سب سے کامیاب بولر رہے جبکہ سیمیول بدری اور آندرے رسل نے دو، دو وکٹیں حاصل کیں۔
