تحریک لبیک کے اشرف جلالی بھی نااہل

لاہور۔۔۔ ٹی ایل پی کے رہنما اشرف جلالی کو بھی لاہور ہائی کورٹ کے الیکشن اپیلٹ ٹریبونل نے قومی اسمبلی کے حلقہ این اے 81 (گوجرانوالہ) سے نااہل قرار دے دیا ہے۔ ذرائع ابلاغ کے مطابق اپیلٹ ٹریبونل میں مولانا اشرف جلالی کے کاغذات نامزدگی کی منظوری کے خلاف اپیل کی سماعت ہوئی جس میں درخواست گزار نے موقف اختیار کیا تھا کہ تحریک لبیک کے امیدوار نے ٹیکس ریٹرن کا ذکر نہیں کیا اور کاغذات میں ان کے تجویز کنندہ اور تائید کنندہ کے بھی دستخط نہیں ہیں۔ اس کے علاوہ عدالت عظمیٰ کے حکم کے باوجود اشرف جلالی نے ریٹرننگ آفیسر کو اپنا پاسپورٹ جمع نہیں کرایا کہ وہ کتنی بار بیرون ملک گئے۔ لہٰذا وہ آرٹیکل 62، 63 کے تحت انتخابات میں حصہ لینے کے اہل نہیں ہیں۔

الیکشن ٹریبونل نے درخواست گزار کی استدعا پر کاغذات نامزدگی منظور کرنے کا حکم کالعدم قرار دے کر الیکشن کے لیے نااہل قرار دے دیا۔