سفارتخانہ میں بزم ریاض کی جانب سے منعقدہ جشن آزادی کی تقریب سے سفیر پاکستان اور سابق آرمی چیف کا خطاب، ملی نغموں نے ماحول گرمائے رکھا
ریاض( ذکاء اللہ محسن )اسلامی عسکری اتحاد کے کمانڈر اور سابق آرمی چیف جنرل ریٹائرڈ راحیل شریف نے کہا کہ آئندہ چند برسوں میں پاکستان اقتصادی طاقت بن کر ابھرے گا اور اس کے ساتھ ساتھ ملک میں امن وامان کی صورتحال بھی بہتر ہوگی پاکستان ہمارا ملک ہے اس کی تعمیر و ترقی میں ملکر کام کرنا ہوگا ان خیالات کا اظہار انہوں نے سفارت خانہ پاکستان میں بزم ریاض کی جانب سے یوم آزادی پاکستان کی تقریب سے خطاب کرتے ہوئے کیا ان کا مزید کہنا تھا کہ پاکستان عظیم ملک ہے اور عوام باصلاحیت ہیں جو ملک سے بے پناہ پیار کرتے ہیں سعودی عرب سمیت جہاں بھی جاتا ہوں تو مجھے فخر ہوتا ہے کہ دنیا میں جہاں بھی پاکستانی مقیم ہیں وہ اپنی شاندار صلاحیتوں اور اپنی کارکردگی کے بل بوتے پر اپنا الگ مقام اور شناخت بنائے ہوئے ہیں اس سے ملک کا نام روشن ہو رہا ہے پاکستان کو مزید بہتر بنانے کے لئے مزید محنت اور لگن کے ساتھ مشترکہ کوششوں سے دنیا کے ترقی یافتہ ممالک کی صف میں کھڑا کیا جا سکتا ہے جب قومیں ملکر جدوجہد کرتی ہیں تو تمام تر سنگ میل عبور کر لئے جاتے ہیں پاکستان کی ترقی کا سفر اور مستقبل اجتماعی کوششوں کے نتیجے میں پوشیدہ ہے ہمیں علامہ اقبال اور قائداعظم محمد علی جناح کی تعلیمات پر عمل پیرا ہوکر ملکی ترقی و استحکام کو یقینی بنانا ہوگا پاکستان میں جمہوریت پھل پھول رہی ہے اور جمہوری نظام مضبوط ہو رہا ہے نئی آنے والی حکومت کے بارے میں امید ہے کہ وہ پاکستان اور عوام کی بھلائی کے لئے بھرپور کام کرے گی ۔ اوورسیزپاکستانیوں کو چاہئے کہ وہ ملک کی نیک نامی کے لئے کام کریں اور اپنی اعلی اقدار کے ذریعے دیگر اقوام میں خود کو نمایاں کریں بزم ریاض کی تقریب کے حوالے سے جنرل راحیل شریف نے نیک تمناو¿ں اور خواہشات کا اظہار کیا۔ سفیر پاکستان خان ھشام بن صدیق نے کہا کہ ہمارا ملک لاکھوں قربانیوں اور جدوجہد کے نتیجے میں معرض وجود میں آیا اس کی بقا کے لئے ہمیں ایک جان ہوکر کام کرنا ہوگا ہمارے آباءو اجداد نے اس ملک کو دنیا کے نقشے پر ابھارنے کے لئے جدوجہد کی آج موجودہ نسل کا فرض ہے کہ وہ جدوجہد کرکے ملک کو معاشی طور پر مضبوط بنانے میں کردار ادا کرے ۔ سعودی عرب میں پاکستانیوں نے بے شمار ایسے کارہائے نمایاں سرانجام دئیے ہیں جن پر یقیناً فخر کیا جا سکتا ہے۔ ہمارے ڈاکٹرز ، انجینیئرز اور افرادی قوت ہمارا فخر اور ہمارا سرمایہ ہیں۔ آج کے دن ہمیں عہد کرنا ہوگا کہ ہمارے لئے سب سے پہلے پاکستان ہے کیونکہ یہی ہماری اصل شناخت اور پہچان بھی ہے۔کشمیر پاکستان کی شہ رگ ہے اور وہ دن دور نہیں جب کشمیری عوام بھی آزادی کی فضاﺅں میں سانس لے گی ۔ بزم ریاض کے بانی تصدق گیلانی کا کہنا تھا کہ آزادی کی قدر ان سے پوچھیں جن کو یہ نعمت نہیں ملی ۔کشمیری بھائی بھارتی ظلم وجبر کا نشانہ بن رہے ہیں دنیا میں اب بھی ایسے کئی ایک ایسے ممالک ہیں جہاں قوموں کو آزادی میسر نہیں ہے مگر ہم پر اللہ کا فضل ہے کہ ہم ایک آزاد قوم ہیں ۔ تقریب سے ہیڈ آف چانسری سیف اللہ خان،بزم ریاض کے صدر ریاض راٹھور، جنرل سیکرٹری وقار نسیم وامق، وسیم ساجد، اشعر نور،نے بھی خطاب کیا اس کے علاوہ یوم آزادی کی تقریب میں ملی نغموں نے بھی ماحول کو خوب پرجوش کئے رکھا ۔ پاکستانی گلوکار مانی چوہان، وسیم رفیق نے ملی نغمے پیش کئے جبکہ نوجوان سعودی گلوکار احمد سلطان نے اردو زبان میں پاکستانی ملی نغمے گا کر حاضرین کو خوب محظوظ کیا ۔ کلام پاک کی تلاوت قاری نعمت اللہ نے کی جبکہ نعت رسول مقبول کہ سعادت محمد اصغر چشتی نے حاصل کی۔ بزم ریاض کی جانب سے سفیر پاکستان خان ھشام بن صدیق اور جنرل راحیل شریف کو اعزازی شیلڈ بھی دی گئی۔
