صدر پاکستان کے نام سعودی قیادت کا تہنیتی پیغام

جدہ ...خادم حرمین شریفین شاہ سلمان نے حلف وفاداری اٹھانے پر صدر پاکستان ڈاکٹر عارف علوی کو سعودی عوام و حکومت اور خود اپنی جانب سے مبارکباد پیش کردی۔ شاہ سلمان نے صدر پاکستان کے نام تہنیتی پیغام میں کہا کہ اسلامی جمہوریہ پاکستان کے صدر کی حیثیت سے حلف وفاداری اٹھانے پر میں آپ کو سعودی عوام و حکومت اور خود اپنی جانب سے بہترین الفاظ میں مبارکباد پیش کرتا ہوں۔ آپ کی صحت و عافیت کا متمنی ہوں اور برادر ملک پاکستان کی مزید ترقی و خوشحالی کا آرزو مند ہوں۔ شاہ سلمان نے اس موقع پر سعودی عرب اور پاکستان کے برادر عوام کے درمیان موجود منفرد تعلقات پر اظہار اطمینان کرتے ہوئے کہا کہ ہم سب تمام شعبوں میں باہمی تعلقات کو مضبوط اور مستحکم بنانے کی کوشش کرتے رہیں گے۔ ولی عہد ، نائب وزیراعظم و وزیر دفاع شہزادہ محمد بن سلمان نے بھی صدر پاکستان کے نام اسی مضمون کا تہنیتی پیغام ارسال کیا۔