پاکستان رینکنگ اسنوکرچیمپیئن شپ بابر مسیح نے جیت لی

کراچی:بابر مسیح نے شاندار کارکردگی کا مظاہرہ کرتے ہوئے ان سیڈڈ آصف ٹوبہ کو ہرا کر رینکنگ اسنوکر چیمپیئن شپ جیت لی۔کراچی جیمخانہ میں کھیلی جانے والی چیمپیئن شپ کا فائنل دلچسپ رہا جس میں بابر مسیح نے بیسٹ آف 15فریمز کے کھیل میں 8-5 سے فتح اپنے نام کی۔ آصف ٹوبہ نے کھیل کا عمدہ آغاز کیا اور ابتدائی دونوں فریم جیت کر برتری حاصل کرلی ، اس کے بعد بابر نے شاندار کم بیک کیا اور اگلے چاروں فریم جیت لئے۔فائنل میں بابر کا کھیل انتہائی شاندار رہا جس میں انہوں نے دو سنچری بریک بھی کھیلے اس سے قبل انہوں نے لیگ راونڈ میں بھی103 کا سنچری بریک کھیلا تھا اس طرح بابر ٹورنامنٹ میں 3 سنچری بریک کے ساتھ ٹاپ رہے۔بیسٹ آف15 مقابلہ10ویں فریم تک انتہائی دلچسپ رہا جس میں دونوں کھلاڑی ایک دوسرے پر بازی لے جاتے رہے لیکن اس کے بعد گیارہویں، بارہویں اور تیرہویں فریمز میں فتح سے بابر نے بازی اپنے نام کی۔ دونوں کے درمیان فائنل میچ 5گھنٹے جاری رہا۔ ٹورنامنٹ جتنے پر بابر کو ایک لاکھ روپے کی انعامی رقم اور ٹرافی جبکہ آصف ٹوبہ کو 40 ہزار روپے اورٹرافی دی گئی۔ٹورنامنٹ کا سب سے بڑا بریک کھیلنے پر محمد ماجد علی کو 5ہزار روپے انعام اور ٹرافی دی گئی۔

کھیلوں کی مزید خبریں پڑھنے کیلئے اردونیوز " واٹس ایپ اسپورٹس گروپ" جوائن کریں