ایشیا کپ: ہند نے پاکستان کو باآسانی 8وکٹوں سے ہرادیا

دبئی: ایشیا کرکٹ کپ کا اہم میچ یکطرفہ ثابت ہوا جب ہندوستان کی ٹیم نے پاکستان کو باآسانی 8وکٹوں سے ہرادیا۔163رنز کا ہدف ہند نے 29اوورز میں 2وکٹوں پر حاصل کرلیا۔ پاکستان ٹیم 43.1اوور میں 162رنز بنا کر آوٹ ہوگئی تھی۔ٹاس جیت کر کپتان سرفراز احمد نے بیٹنگ کا فیصلہ کیا جو وکٹ کے حساب سے درست ثابت نہ ہوا۔امام الحق اور فخر زمان نے اننگز کا آغاز کیا ۔ تیسرے اوور میں امام الحق نے2 کے اسکور پر غلط شاٹ کھیلا اور وکٹ کیپر دھونی کو کیچ تھما دیا۔ پاکستان ٹیم ابتدائی 10اوورز میں صرف 25رنز بنا سکی تھی۔ بابر اعظم نے فخر زمان کے ساتھ مل کر دباوسے نکلنے کی ناکام کوشش کی تا ہم فخر زمان نے بھونیشور کمار کی گیند پر انتہائی اونچا شاٹ کھیلتے ہوئے چہل کو آسان کیچ دیدیا۔ ابتدائی دونوں وکٹیں حاصل کرنے پر بھونیشور کو مین آف دی میچ کا اعزاز دیا گیا۔شعیب ملک نے بابر اعظم کے ساتھ مل کر وکٹ پر ٹھہرنے کا فیصلہ کیا ۔جسپریت بمرا انتہائی طاقت سے بولنگ کے باعث گر گئے۔ کمر میں تکلیف کے باعث انہیں اسٹریچر پر گراونڈ سے باہر لیجایا گیا ۔ بابر اعظم نے 6چوکوں کی مدد سے 47رنز بنائے ، کلدیپ یادو نے انہیں کلین بولڈ کر دیا۔شعیب ملک 42رنز بنا کر رن آوٹ ہوگئے۔ سرفراز احمد کے ساتھ آصف علی نے وکٹ پر ٹھہرنے کی کوشش کی لیکن دونوں کو کیدار جادھو نے آوٹ کردیا۔ سرفراز احمد 6اور آصف علی 9رنز بنا سکے۔ شاداب خان بھی 8رنز بنا کر جادھو کا شکار بنے ۔ فہیم اشرف 21رنز بنا کر جسپریت بمرا کا شکار ہوئے۔ بھونیشور کمار اور کیدار جادھو نے 3،3وکٹیں حاصل کیں ، بمرا نے 2 کھلاڑیوں کو آوٹ کیا۔ آسان ہدف کے تعاقب میں اوپنرز شیکھر دھون کے ساتھ روہت شرمانے اسکور کو 86رنز تک پہنچا دیا۔ بالآخر شاداب خان نے روہت شرما کو کو کلین بولڈ کر دیا ، روہت نے نصف سنچری اسکور کرتے ہوئے 3چھکوں اور 6چوکوں کی مددسے 52رنز بنائے۔ شیکھر دھون کو 46رنز پرفہیم اشرف نے بابر اعظم کے ہاتھوں کیچ آوٹ کرادیا۔ امباتی رائڈو اور دنیش کارتک بالترتیب 31، 31رنز بنا کر ناٹ آوٹ رہے۔محمد عامر اور عثمان خان کی خواہش اور دعوے دھرے رہ گئے جب کوئی وکٹ ان کے حصے میں نہ آسکی۔ پاکستان 23ستمبر کو سپر 4مرحلے میں ایک بار پھر ہند سے مقابلے کیلئے میدان میں اترے گا۔ 

کھیلوں کی مزید خبریں پڑھنے کیلئے اردونیوز " واٹس ایپ اسپورٹس گروپ" جوائن کریں