ابوظبی ٹی ٹوئنٹی : لاہور قلندرز کی پہلی فتح

ابوظبی: ٹی ٹوئنٹی کپ کے دوسرے میچ میں لاہور قلندرز نے سہیل اختر کے 100رنز کی بدولت یارکشائر وائی کنگز کو 6 وکٹوں سے شکست دے دی۔یارکشائر وائی کنگز نے پہلے کھیلتے ہوئے مقررہ 20اوور میں 5 وکٹ کے نقصان پر 184رنز بنائے تھے۔ بروک نے 37 گیری بیلنس 33 اسکور کیا جبکہ لیننگ 26 رنز بنا کر ناٹ آوٹ رہے۔ لاہور قلندرز کی جانب سے شاہین شاہ آفریدی اور فرحان راجہ نے 2-2 کھلاڑیوں کو آوٹ کیا۔ہدف کے تعاقب میں لاہور قلندرز کی طرف سے عمران نذیر اور کپتان سہیل اختر نے اننگز کا آغاز کیا۔ عمران نذیر ایک رنر بنا کرلوٹ گئے جبکہ سہیل اختر نے برق رفتار اننگز کھیلتے ہوئے 56 گیندوں پر سنچری بنا کر ٹیم کی فتح میں بنیادی کردار ادا کیا۔ لاہور قلندرز نے 185 رنز کا ہدف میچ کے آخری اوور میں حاصل کیا۔ لاہور قلندرزکی جانب سے سہیل اختر 100 اور بلال ارشاد 30 رنز بنا کر نمایاں رہے جبکہ فل سالٹ 37 رنز کے ساتھ ناقابل شکست رہے۔ ایک موقع پر فیلڈ امپائر نے سہیل اختر کو باونڈری پر کیچ آوٹ قرار دے دیا تھا تاہم تھرڈ امپائر نے انہیں ناٹ آوٹ قرار دے کر کھیلنے کی اجازت دے دی ۔ فیلڈ امپائر نے اپنا فیصلہ تبدیل کر کے ان کی شاٹ کو بھی چھکا تسلیم کرلیا ۔لاہور قلندر زکے کپتان سہیل اختر کا کہنا ہے کہ کامیابی پر بہت خوش ہوں ۔ قبل ازیں پہلے میچ میں بوسٹ ڈیفنڈرز نے آکلینڈ ایسس کو شکست دے دی۔ بوسٹ ڈیفنڈرز نے 5 وکٹ پر 205 رنز بنائے۔ جنوبی افریقہ سے تعلق رکھنے والے کولن انگرام نے 84 رنز کی ناقابل شکست اننگز کھیلی۔جواب میں آکلینڈ ایسس کی ٹیم مقررہ اوورز میں 170 رنز بناسکی۔ اوڈونل 67 رنز بناکر ناٹ آوٹ رہے۔کائل ایبٹ نے 3 کھلاڑیوں کو آوٹ کیا

کھیلوں کی مزید خبریں پڑھنے کیلئے اردونیوز " واٹس ایپ اسپورٹس" گروپ  جوائن کریں