ایشیائی بینک ، پاکستان کو 7.1ارب ڈالر دے گا
اسلام آباد...ایشیائی ترقیاتی بینک نے آئندہ 3 برسوں کے دوران پاکستان کو 7.1 ارب ڈالر کی معاونت فراہم کرنے کا اعلان کردیا۔ایشیائی ترقیاتی بینک کے اعلامیے کے مطابق اے ڈی بی کے حکام نے وزیر خزانہ اسد عمر، وزیر منصوبہ بندی خسرو بختیار اور دیگر حکام سے ملاقات کی۔ نئی حکومت کے پہلے 100 روزہ پلان کو سراہا گیا۔اعلامیے میں کہا گیا کہ آ ٓئندہ 3 سال کے دوران پاکستان میں پائیدار اقتصادی ترقی کے اہداف کے حصول کیلئے 7.1 ارب ڈالر کی معاونت فراہم کئے جائیں گے ۔ اے ڈی بی کی جانب سے توانائی، بنیادی ڈھانچے، ترقی اور صنعتی اصلاحات کے منصوبہ جات کیلئے تکنیکی و مالی معاونت فراہم کی جائے گی۔اے ڈی بی کے نائب صدر وینکائی ژینگ نے کہا کہ پاکستان میں تعلیم، صحت اور سماجی شعبوں کی ترقی پر خصوی توجہ دی جائے گی تاکہ پائیدار ترقی کے اہداف کے حصول کو یقینی بنایا جاسکے۔ انہوں نے کہا کہ اے ڈی بی اورپاکستان کی ترقیاتی شراکت داری 50 سال کے طویل عرصہ کی تاریخ کی حامل ہے۔اعلامیے کے مطابق پاکستانی معیشت کو کرنٹ اکاو¿نٹ خسارہ اور مالیاتی خسارے کا سامنا ہے۔ نجی شعبے کی ترقی، تجارتی فروغ اور اداروں میں اصلاحات کی فوری ضرورت ہے۔
