امریکہ میں پیدا ہونیوالے بچے کو شہریت نہیں ملے گی؟

واشنگٹن۔۔۔ امریکی صدر ڈونلڈ ٹرمپ نے تجویز پیش کی ہے کہ غیرامریکی باشندوں اور غیرقانونی تارکین وطن  کے امریکہ میں پیدا ہونے والے بچوں کو امریکی شہریت دینے کا سلسلہ بند ہونا چاہیے۔انہوں نے یہ تجویز ایک انٹرویو دیتے ہوئے دی۔ ڈونلڈ ٹرمپ کی پیش کردہ تجویز پر امریکہ میں نئی آئینی و قانونی بحث چھڑ گئی ہے کیونکہ گزشتہ 150 سال سے یہ امریکہ کا قانون ہے کہ اس کی سرزمین پر پیدا ہونے والا بچہ ازخود امریکی شہریت کا حامل تسلیم کیا جاتا ہے۔امریکی صدر نے اس ضمن میں کہا کہ وہ اس بات کے خواہش مند ہیں کہ انتظامی حکم نامے کے ذریعے بچے کی پیدائش پر امریکی شہریت دینے کی پالیسی ختم کردی جائے۔امریکی صدر نے دعویٰ کیا کہ ان کی پیش کردہ تجویز پر سنجیدگی سے کام ہورہا ہے اور ایسا ہی ہوگا۔ ٹرمپ نے کہا کہ امریکہ دنیا کا واحد ملک ہے کہ جہاں کوئی بھی پیدا ہونے والا بچہ نہ صرف امریکی شہری قرار پاتا ہے بلکہ ان تمام فوائد کا بھی حقدار ٹھہرتا ہے جو ہمارے شہریوں کے لیے مختص ہیں۔پیدائش پر امریکی شہریت دینے کے  آئینی و قانونی حق کو انہوں نے ’مضحکہ خیز‘ قرار دیا اور زور دے کر کہا کہ اس سلسلے کو ختم ہونا چاہیے۔امریکی صدر ڈونلڈ ٹرمپ نے کہا کہ اپنے وکیل سے مشورہ کیا ہے جس نے انہیں بتایا ہے کہ پیدائش پر امریکی شہریت دینے کی پالیسی کو ختم کرنے کے لیے کسی  آئینی ترمیم کی ضرورت نہیں ہے۔