سلویسٹر اسٹیلون کی’’ ریمبو 5 لاسٹ بلڈ ‘‘اور’’ کریڈ2 ‘‘کی نئی جھلکیاں
ہالی وڈاداکارسلویسٹر اسٹیلون کا مشہورِ زمانہ کردار جان ریمبو کئی دہائیاں گزر جانے کے باوجود آج بھی مداحوں کے دِلوں پر راج کر رہا ہے تاہم اب مداحوں کے لئے خوشخبری ہے کہ ریمبو فلم سیریز کی پانچویں فلم ریمبو 5لاسٹ بلڈکی پہلی جھلک جاری کر دی گئی ہے جو آئندہ سال نمائش کیلئے پیش کر دی جائے گی۔ایکشن اور تھرل سے بھرپور اس فلم میںسلویسٹر اسٹیلون مرکزی کردار ریمبو میں ایک بار پھر سے جلوہ گرہو ں گے۔فلم میں اداکارارپیز ویگا، آسکر جینیڈا،اینڈریابیریزا،ارون کوہان ،جاوکوئن کوسیواورسرجیو پیرسکئی جیسے فنکار اہم کرداروں میں دکھائی دیں گے جبکہ جان ریمبو ایک بار پھرسے خطرناک مشن سر انجام دیتے نظر آئیں گے ۔
دریں اثناء اداکارسلویسٹر اسٹیلون کی ا سپورٹس ڈرامہ فلم’’ کریڈ2 ‘‘کی نئی جھلکیاں جاری کردی گئی ہیں۔ اسٹیون کیپل جونیئرکی ہدایتکاری میں بننے والی یہ فلم2015ء میں ریلیز ہونے والی ’’کریڈ‘‘ کا سیکوئل ہے جس کی کہانی مشہور فلمی کردار، باکسر اپولو کریڈ کے بیٹے کے گرد گھومتی ہے جو باکسنگ کی ٹریننگ حاصل کرنے کے بعد والد کا نام مزید روشن کرنے کیلئے رِنگ میں اترتا ہے۔
فلم میں اداکاری کے جوہر دکھانے والوں میں سلویسٹر اسٹیلون اور مائیکل بی جارڈن کے علاوہ ٹیسا تھامپسن،ڈالف لنگرین، فلورین مینٹیانو اور ووڈ ہیرس سمیت دیگر فنکار شامل ہیں۔ایرون ونکلر اورچارلس ونکلر کی مشترکہ پروڈکشن میں بننے والی یہ فلم 21نومبر کو سینما گھروں میں نمائش کیلئے پیش کی جائے گی۔
