ویمنر ہاکی چیمپیئن شپ سے خواتین کھلاڑیوں کی حوصلہ افزائی ہوگی
لاہور: صوبائی وزیر کھیل و امور نوجوانان رائے تیمور خان بھٹی نے کہا ہے کہ30 ویں سینیئر ویمنز نیشنل ہاکی چیمپیئن شپ کاانعقاد خوش آئند ہے جس سے خواتین کھلاڑیوں کی حوصلہ افزائی ہوگی اور قومی ٹیم کیلئے اچھی کھلاڑی مل سکیں گی۔ خواتین کو اسپورٹس کے میدان میں بھی آگے آنا چاہئے، اسپورٹس کے فروغ کیلئے ا سپورٹس بورڈ پنجاب محکمہ ہائر ایجوکیشن کے تعاون سے اسپورٹس اکیڈمی قائم کرے گاجس میں ماہر کوچز خاتون کھلاڑیوں کی صلاحیتوں کو مزید نکھاریں گے، ہر کھیل کی لیگ کرائیں گے، 8 سال بعد سالانہ ا سپورٹس کیلنڈر جاری کردیا گیا ہے جس کے تحت تحصیل کی سطح پر کھیلوں کے مقابلے شروع ہوچکے ہیں تاکہ گراس روٹ لیول سے نئے کھلاڑی تلاش کئے جا سکیں۔ڈی جی اسپورٹس پنجاب ندیم سرور نے کہا ہے کہ اسپورٹس کیلنڈر کے تحت جاری مقابلوں میں ہزاروں کھلاڑی جوش و خروش سے حصہ لے رہے ہیں ۔ یہ نیا ٹیلنٹ سامنے کے لئے پہلا قدم ہے ، ا سپورٹس کے فروغ کے تمام وسائل استعمال کئے جا رہے ہیں۔ پیر کے روز نیشنل ہاکی ا سٹیڈیم میں 30 ویں سینیئر وومن ہاکی چیمپیئن شپ کی افتتاحی تقریب کے موقع پر ڈی جی اسپورٹس پنجاب ندیم سرور، سیکرٹری پاکستان ہاکی فیڈریشن شہباز سینیئر، جی ایم وومن ہاکی فیڈریشن تنزیلہ عامر چیمہ اور چاند پروین بھی موجود تھےں۔صوبائی وزیر کھیل و امور نوجوانان رائے تیمور خان بھٹی نے 30 سینئر وومن ہاکی چیمپئن شپ کے باقاعدہ آغاز کا اعلان کیا، چمپئن شپ میں شریک 11 ٹیموں نے مارچ پاسٹ کیا اور صوبائی وزیر کھیل و امور نوجوانان رائے تیمور خان بھٹی اور ڈیی جی ا سپورٹس پنجاب ندیم سرور کو سلامی پیش کی۔ تیمور بھٹی نے کہا کہ وزیراعظم عمران خان کے ویژن کے مطابق تحصیل کی سطح پرا سپورٹس کو فروغ دیں گے، اسپورٹس بورڈ پنجاب محکمہ ہائر ایجوکیشن کے تعاون سے نئی ا سپورٹس اکیڈمی قائم کرے گا۔ا سکولوں، کالجوں اور یونیورسٹیز میں شاندار کارکردگی کا مظاہرہ کرنے والوں کھلاڑیوں کوا سپورٹس اکیڈمی میں لائیں گے جہاں ماہر کوچز ان کو تربیت دیں گے اور اس کے ساتھ کھلاڑیوں کی تعلیم کا سلسلہ بھی جاری رہے گا۔ تیمور خان نے کہا کہ ہاکی کے فروغ کے لئے تعاون کررہے ہیں اور کرتے رہیں گے۔ ندیم سرور نے کہا کہ ہاکی ہمارا قومی کھیل ہے، 30سینیئر وومن ہاکی چیمپیئن شپ کے انعقاد سے خواتین میں ہاکی کا کھیل مقبول ہوگا ۔
کھیلوں کی مزید خبریں اور تجزیئے پڑھنے کیلئے واٹس ایپ گروپ"اردو نیوزاسپورٹس"جوائن کریں
