ریاض ۔۔۔سعودی قومی بجٹ 2019ء کے اجراء کے بعد متعدد وزراء نے اپنی وزارتوں کے سائبان تلے مستقبل کی اسکیموں اور عوام کیلئے خوشخبریوں کے اعلان کا اہتمام کیا ۔ وزیر محنت احمد الراجحی نے بتایا کہ وزارت مواصلات 15ہزار ملازمتیں سعودیوں کو فراہم کریگی ۔وزارت آبادکاری اور سعودی ایوانہائے صنعت و تجارت کونسل نے ٹھیکیداروں اور غیر منقولہ جائیدادوں کے شعبے میں 80ہزار سعودی ملازم رکھنے کا معاہدہ کیا ہے ۔ مجموعی طور پر 95ہزار ملازمتیں مہیا ہوں گی ۔ وزیر صحت توفیق الربیعہ نے بتایا کہ ان کی وزارت سعودیوں اور مقیم غیر ملکیوں کو پیش کی جانیوالی صحت خدمات کا معیار بلند کرنے کیلئے 3اہم اہداف پورے کریگی ۔ وزیر تعلیم نے بتایا کہ 5200نئے اسکول قائم ہوں گے اور کرائے کے اسکولوں سے نجات حاصل کر لی جائے گی ۔
