سائرہ، شہروز: شوبز کے چہروں کا حقِ رازداری

گذشتہ ہفتے سوشل میڈیا پر ایک جوڑے کی علیحدگی کو لے کر خوب باتیں ہوئیں۔ اس اثنا میں الزامات بھی لگائے گئے اور ایک خاتون اداکارہ کے لیے ہمدردی بھی جتائی گئی۔ البتہ، جو بات سوشل میڈیا کے کئی صارفیں سمجھنے سے قاصر رہے وہ یہ تھی کہ شاید مشکل کی اس گھڑی سے گزرنے والے جوڑے کو اس سب کی کوئی ضرورت نہیں بلکہ وہ اپنے حقِ رازداری کے طلبگار ہوں۔

قابلِ ذکر ہے کہ شوبز سے وابستہ یہ جوڑا پچھلے سات سال سے ساتھ ہے اور شاید اب تک ہو کیونکہ علیحدگی کے بارے میں اب تک دونوں قریقین نے کسی بھی قسم کی اطلاعات کی تصدیق نہیں کی ہے۔ جس کا مطلب یہی ظاہر ہوتا ہے کہ وہ اس بات کو عوام میں عیاں کرنے یا نہ کرنے کے لیے فی الحال آمادہ نہیں ہیں۔

جہاں سوشل میڈیا پر کئی ایک صارفین اور مقامی خبر رساں اداروں نے اس بات پر قیاس آرائیاں شروع کردیں وہیں معدودے چند افراد ایسے بھی تھے جنہوں نے صارفیں کی توجہ اس طرف مبذول کروائی ہے کہ تصدیق نہ ہونے پر جوڑے کے مداحوں کو انکی مبینہ علیحدگی کے بارے میں بات نہیں کرنی چاہئیے۔

اس حوالے سے اداکارہ ایمان سلیمان نے بھی سوشل میڈیا کا رخ کیا اور اپنی رائے دی۔

دونوں اداکار جن کی علیحدگی کی غیر مستند خبریں سوشل میڈیا پر شائع کی جارہی ہیں اب تک اس بارے میں خاموشی اختیار کیے ہوئے ہیں، جو اس بات کا ثبوت ہے کو وہ اپنے چاہنے والوں سے بھی یہی توقع رکھنا چاہتے ہیں۔

متذکرہ جوڑا اداکار اور شوبز کا چہرہ ہونے سے قبل انسان بھی ہیں جن کو رازداری کا اتنا ہی حق ہے جتنا عام انسانوں کو۔

البتہ، رادزاری کے حقوق سے نابلد صارفین نے سوشل میڈیا پر چند ہی گھنٹوں میں اس جوڑے پر ٹرینڈ بنا دیا جو سر فہرست رہا۔

اسکے ساتھ ساتھ شوبز سے وابستہ ایک اور خاتون پر الزامات کی بوچھاڑ کی گئی جن کے بارے میں کہا جارہا ہے کہ وہ جوڑے کی علیحدگی کی ذمہ دار ہیں۔ انکے سوشل میڈیا کے پیجز پر انکو آن لائن ہراساں کیا جارہا ہے جب کہ اس بارے میں انہوں نے بھی کچھ کہنے سے دریغ کیا ہے۔

رازداری کے حقوق ہمیں سکھاتے ہیں کہ ہر انسان کو یہ حق حاصل ہے کہ وہ اپنی ذاتی زندگی کے مسائل اگر چاہے تو راز رکھ سکتا ہے اگر وہ راز دیگر عوام سے جڑے ہوئے نہ ہوں یا کسی بھی طرح انہیں نقصان نہ پہنچاتے ہوں۔

ایک خوشحال جوڑے کی علیحدگی ایک پریشان کن بات ہے جو جوڑے کے لیے نہایت تکلیف دہ مرحلہ ہوتا ہے ایسے میں انکی رازداری کو پامال کرتے ہوئے انکی ذاتی زندگی پر انگلی اٹھانا یا قیاس آرائیاں کرنا انکی لیے مزید تکلیف و غم کا باعث بن سکتا ہے۔