بدعنوانوں میں فیکلٹیوں کے سابق ڈین بھی شامل ہیں ( فوٹو: سبق)
مکہ مکرمہ میں فوجداری کی عدالت نے ایک یونیورسٹی کے 6 عہدیداروں کو بدعنوان ثابت ہوجانے پر جیل اور جرمانے کی سزائیں سنائی ہیں۔
بدعنوانوں میں فیکلٹیوں کے سابق ڈین بھی شامل ہیں۔ ان پر سرکاری خزانہ لوٹنے سمیت مختلف الزامات لگائے گئے تھے جوثابت ہوگئے ہیں۔
اخبار 24 کے مطابق یونیورسٹی کے 6 عہدیداروں کو یونیورسٹی میں ٹھیکوں میں گھپلے بازی کا مجرم پایا گیا۔ ان میں سے ہر ایک پر ایک، ایک لاکھ ریال جرمانے کی سزا دی گئی۔
دو کو سرکاری دستاویزات میں جعلسازی کا مجرم قرار دیا گیا۔ ان پر دو لاکھ ریال جرمانہ لگایا گیا۔
یونیورسٹی کے ان 6 عہدیداروں نے اپنے عہدے سے ناجائز فائدہ اٹھایا ( فوٹو: سبق)
عدالت نے دو ملزمان کو انسداد رشوت قانون کی خلاف ورزی پرایک برس قید کی سزا سنائی جبکہ ایک اور عہدیدار کو غبن کا مجرم پایا گیا اور اسے 50 ہزار ریال جرمانہ ادا کرنے کا حکم دیا گیا۔
تحقیقات سے یہ بات بھی سامنے آئی کہ یونیورسٹی کے ان 6 عہدیداروں نے اپنے عہدے سے ناجائز فائدہ اٹھایا۔ انہوں نے ایک کمپنی کو جان بوجھ کر ٹھیکہ نہیں دیا اور دوسری کمپنی کو جس نے زیادہ بڑی رقم کا ٹینڈر بھرا تھا ٹھیکہ دے دیا اور سرکاری خزانے پر 14 ملین ریال سے زیادہ کا بوجھ ڈالا۔
علاوہ ازیں ٹھیکہ ایسی کمپنیوں کو دیا گیا جو تعلیمی عملے کے ساتھ سانٹھ گانٹھ کیے ہوئے تھیں۔
باخبر ذرائع کا کہنا ہے کہ یونیورسٹی کے عہدیداروں نے فوجداری عدالت کے فیصلے پر اعتراض کیا ہے۔ انہوں نے عدالتی فیصلہ کالعدم کرنے اور خود کو بری الذمہ ثابت کرنے کے لیے مکہ مکرمہ اپیل کورٹ سے رجوع کر لیا ہے۔
