ایئر فورس کا ایف 16 اسلام آباد میں گر کر تباہ

وفاقی دارالحکومت اسلام آباد میں پاکستانی فضائیہ کا ایک ایف 16 طیارہ گر کر تباہ ہو گیا ہے۔ حادثے میں پائلٹ ونگ کمانڈر نعمان اکرم ہلاک ہو گئے ہیں۔

بدھ کی صبح تقریباً 10 بج کر 55 منٹ پر اسلام آباد میں یہ طیارہ اس مقام کے قریب گرا ہے جہاں پر 23 مارچ کو یوم پاکستان کی تقریبات منعقد ہوا کرتی ہیں۔ اس جگہ زیادہ آبادی نہیں ہے۔

پاکستان فضائیہ کی جانب سے جاری ہونے والے بیان کے مطابق جنگی طیارہ ایف سولہ 23 مارچ کو منعقد ہونے والی یوم پاکستان کی تقریبات کے حوالے سے تیاریوں میں شریک تھا کہ شکر پڑیاں کے قریب گر کر تباہ ہو گیا۔ بیان کے مطابق اس حادثے کی تحقیقات کا حکم دے دیا گیا ہے۔

اس سے قبل پاکستانی فضائیہ کے ترجمان ایئر کموڈور احمر رضا نے اردو نیوز کو پاکستانی فضائیہ کے طیارے کے حادثے کی تصدیق کی تھی۔ 

پاکستان فضائیہ کے ترجمان نے اردو نیوز سے بات کرتے ہوئے بتایا کہ حادثے کا شکار ہونے والے طیارے کے پائلٹ نعمان اکرم ہلاک ہو گئے ہیں۔

ونگ کمانڈر نعمان اکرم ایئرفورس کی جانب سے ہونے والے انٹرا سکواڈرن آرمامنٹ کمپیٹیشن 2019 میں سب سے زیادہ پوائنٹس حاصل کر کے فاتح رہے تھے جس پر انہیں شیرافگن ٹرافی دی گئی تھی۔

قانون نافذ کرنے والے اداروں کے اہلکار اور فضائیہ کی ٹیمیں جائے وقوع پر پہنچ گئی ہیں۔

جہاں طیارہ گر کر تباہ ہوا وہاں سے کچھ دور موجود عینی شاہدین نے بتایا کہ انہوں نے ایک جنگی جہاز کو سیکٹر جی سکس کے اوپر سے پرواز کرتے دیکھا۔ ایک عینی شاہد نے بتایا کہ ’اچانک جہاز کا رخ نیچے کی جانب ہو گیا اور ہمیں لگا کہ یہ معمول کی بات ہے۔  لیکن جہاز دوبارہ اوپر نہیں آیا اور چند سکینڈز بعد اس جگہ سے دھوئیں کے بادل اٹھتے ہوئے دکھائی دینا شروع ہوگئے۔‘
وفاقی دارالحکومت اسلام آباد میں ان دنوں یوم پاکستان کی تقریبات کی تیاریوں کے حوالے سے فضائیہ کے جنگی طیارے مشقیں کر رہے ہیں۔

ونگ کمانڈر نعمان اکرم کون تھے؟

بدھ کی صبح دس بج کر پچپن منٹ پراسلام آباد میں گر کر تباہ ہونے والے پاک فضائیہ کے ایف 16 طیارے میں ہلاک ہونے والے ونگ کمانڈر نعمان اکرم کے حوالے سے معلوم ہوا ہے کہ وہ سنہ 2000 میں 106 ویں جی ڈی پائلٹ کورس سے پاس آؤٹ ہوئے تھے۔ انہوں نے انٹرا سکوارڈن آرمامنٹ کمپٹیشن 2019 بھی جیتا تھا جس پر ان کو شیرافگن ٹرافی دی گئی تھی۔ 

ونگ کمانڈر نعمان اکرام کا تعلق سرگودھا میں پاکستان فضائیہ کی مصحف بیس میں تعینات سکوارڈن 9 سے تھا۔ 

23 مارچ کو منعقد ہونے والی یوم پاکستان کی تقریب طیارے ریہرسل کر رہے تھے کہ حادثہ پیش آ گیا۔ 

سرکاری ٹی وی پر میزبان یشفین جمال نے چند ماہ قبل نعمان اکرم کے ساتھ کیا جانے والا انٹرویو ٹوئٹر پر شیئر کیا۔ جس میں نعمان اکرم کہہ رہے ہیں: 

’میں قوم کو یہی کہنا چاہوں کہ گا جس طرح ایئر فورس کی تاریخ رہی ہے، جو ہم نے اپنے بڑوں سے سیکھا اور ہم بھی انہی کی پیروی کر رہے ہیں، جب بھی ملک کو، قوم کو ایئر فورس کی ضرورت پڑی تو اہم اپنی جان کا نذرانہ دینے سے بھی دریغ نہیں کریں گے۔ اور جو کچھ ہو سکا اہم اپنے ملک کے لیے کرنے کو تیار ہیں، آپ لوگوں سے ہماری یہ درخواست ہے کہ آپ اپنا کام جاری رکھیں، بالکل پریشان مت ہوں، آپ محفوظ ہاتھوں میں ہیں۔ اور ایئر فورس پاکستان کی حفاظت کے لیے ہمہ وقت تیار ہے‘ 

اس وقت سوشل میڈیا پر صارفین کی جانب سے اس ویڈیو اور تصاویر شیئر کی جا رہی ہیں۔