'قوم کو تمیزدار ہونے پر مبارک باد'

بیٹا احتیاط کرو، دھیان رکھو، یہ جملے بچپن سے ہی انسان کے ساتھ ساتھ ہیں۔ لیکن اب جب کہ وقت ہے اور ہر طرف سے ایک ہی آواز سننے کو مل رہی ہے تو ہم آخر اس سے خوفزدہ کیوں ہیں۔

احتیاط بظاہر انتہائی چھوٹا اور آسان لفظ ہے – اس کا استعمال ہم اپنی روزمرہ زندگی میں بھی بہت کرتے ہیں مگر آج کل کے ان حالات میں جب حقیقت ’ احتیاط ‘ کرنا پڑ گیا ہے تو پاکستان سمیت کئی ممالک میں لوگوں کو پریشانی کا سامنا کیوں ہے؟

گذشتہ کچھ دنوں میں سوشل میڈیا پر ایسی کچھ تصاویر نظر سے گزریں جن میں عوام کو سوشل ڈسٹنسنگ یعنی سماجی دوری اختیار کرتے دیکھا گیا۔

سوشل میڈیا کا ایک فائدہ یہ بھی ہے کہ وائرل ہونے والی تصاویر کے ساتھ منفرد اور دلچسپ تبصرے بھی دیکھنے کو ملے جن میں سے چند یہ ہیں۔

یہ تصویر پاکستان کے درالحکومت اسلام آباد کے سیکٹر f-6 کی ہے جہاں شہری ایک نجی سٹور کے باہر فاصلے پر کھڑے ہوکر اپنی باری آنے کا انتظار کر رہے ہیں۔ بلاشبہ یہ ایک اچھا قدم ہے اور ہم سب کو بھی اس پر عمل کرنا چاہیے کیونکہ ان حالات میں جب کورونا وائرس تیزی سے پھیل رہا ہے اس سے بچنے کا واحد طریقہ 'احتیاط' ہی ہے۔

یہ تصویر زیم نامی ٹوئٹر اکاونٹ سے شئیر کی گئی جس پر انہوں نے لکھا ’ قوم کو تمیزدار ہونے پر مبارکباد۔‘

ڈپٹی کمشنر اسلام آباد حمزہ شفقات کی ٹویٹ کی مطابق ضلعی انتظامیہ کا شہر میں کورونا کے حوالے سے جاری کردو ضابطہ کار یقینی بنانے کے لیے ایکشن لیا گیا ہے۔ جس کے مطابق دکانوں پر سات سے زیادہ افراد کے جمع ہونے پر پابندی ہے خلاف ورزی کرنے والی 325 دکانوں کو بند بھی کیا  گیا۔

دکانوں پر گاہکوں کی ڈیلنگ کے حوالے سے تصاویر بھی جاری کی گئیں ہیں، جن میں انہیں گاہکوں کے ساتھ احتیاطی تدابیر کے تحت ڈیلنگ کرنے کا طریقہ کار بھی بتایا گیا ہے۔

پاکستانی سینیٹر کرشنا کماری نے ضلع تھرپارکر کے علاقے نگر پارکر کی تصویر شئیر کی جس میں گاہک کریانہ سٹورز پر سوشل ڈسٹنسنگ کے اصول کے مطابق فاصلے سے کھڑے ہیں۔

نہ صرف پاکستان بلکہ انڈیا سے بھی سماجی دوری سے وابستہ کئی تصاویر سوشل میڈیا پر زیر بحث رہی۔

این ڈی ٹی وی کی ایڈیٹر عما سدھر نے آندھرا پردیش میں ریتھیوبازادر میں لوگوں کی سبزی خریدتے ہوئے تصاویر شئیر کی جس میں لوگ قطار میں فاصلے سے کھڑے ہیں اور خریداری بھی کر رہے ہیں۔

انگلینڈ پولیس کی رورل ٹیم کی جانب سے ٹوئٹر اکاونٹ پر شئیر کی جانے والی تصویر میں پولیس اہلکار دو میٹر کے فاصلے کا مظاہرہ کر رہے ہیں اور لوگوں سے اپیل بھی کہ حکومت کی جانب سے جاری کیے جانے والے اصولوں پر عمل کریں۔