کورونا سے صحت یاب بزنس مین نے دفتر کو ہسپتال بنا دیا

انڈیا میں کورونا وائرس سے صحت یاب ہونے والے کاروباری شخص نے کورونا کے مریضوں کو صحت کی مفت سہولیات فراہم کرنے کے لیے اپنے دفتر کو ہسپتال میں تبدیل کر دیا ہے۔

فرانسیسی خبر رساں ایجنسی اے ایف پی کے مطابق یہ ہسپتال 85 بیڈز پر مشتمل ہے۔

واضح رہے کہ انڈیا کورونا وائرس کے متاثرین کے حوالے سے امریکہ اور برازیل کے بعد دنیا میں تیسرے نمبر پر ہے۔

انڈیا میں سرکاری ہسپتالوں میں جگہ کم ہونے کی وجہ سے قادر شیخ 20 روز تک سورت شہر میں ایک پرائیویٹ کلینک میں زیر علاج رہے اور ہسپتال کا بل دیکھ کر حیران رہ گئے۔

پراپرٹی کا بزنس کرنے والے قادر شیخ کا کہنا تھا کہ ’نجی ہسپتال میں علاج بہت مہنگا تھا۔ غریبوں کے لیے اس طرح کے علاج کا خرچہ برداشت کرنا بہت مشکل ہے۔‘

’لہذا میں نے اس طرح کورونا وائرس کی وبا کے خلاف کچھ کرنے اور اپنا حصہ ڈالنے کا فیصلہ کیا۔‘

اے ایف پی کے مطابق صحت یاب ہونے کے بعد قادر شیخ نے اپنے 30 ہزار مربع فٹ پر پھیلے دفتر کو ہسپتال میں تبدیل کرنے کے لیے حکومت سے منظوری حاصل کی۔

اس ہسپتال میں علاج کے لیے حکومت عملے، دوائیوں اور طبی آلات کا خرچ برداشت کرتی ہے جبکہ قادر شیخ نے بیڈز خریدے اور وہ بجلی کا بل بھی خود دیتے ہیں۔

انہوں نے کہا کہ اس ہسپتال میں کسی کا بھی مفت علاج ہو سکتا ہے۔

انڈیا میں کورونا متاثرین کی تعداد 15 لاکھ سے تجاوز کر گئی ہے اور 35 ہزار سے زائد افراد ہلاک ہو چکے ہیں۔