ہاتھی نے بس روکی اور کیلے لے کر چلتا بنا

سری لنکا میں ایک ہاتھی نے سڑک کے درمیان کھڑے ہو کر ایک بس کو رکنے پر مجبور کر دیا اور کھڑکی سے اپنی سُونڈ بس کے اندر ڈالی اور کیلوں کا ایک گچھا اُڑا لیا۔

سماجی رابطے کی ویب سائٹ ٹوئٹر پر ہاتھی کی ویڈیو وائرل ہے جسے اڑھائی لاکھ افراد دیکھ چکے ہیں اور اس ویڈیو کو بس کے کسی مسافر نے بنایا ہے۔

انڈین نیوز چینل این ڈی ٹی وی کے مطابق یہ ویڈیو سری لنکا کے شہر کتارنگاما کی ہے۔

ویڈیو می دیکھا جاسکتا ہے کہ ہاتھی سڑک کے درمیان کھڑا ہے اور ڈرائیور اسے دیکھ کر بس روک لیتا ہے اور اس کے بعد ہاتھی بس کی طرف آتا ہے اور ڈرائیور والی سائیڈ کی کھڑکی سے اپنی سُونڈ ڈرائیور کے سر کے اوپر سے گزارتے ہوئے اندر ڈالتا ہے اور کھانے کی چیزیں ڈھونڈنے لگتا ہے۔

بس کا ایک مسافر، ہاتھی کی سُونڈ میں کیلوں کا گُچھا پھنسانے کی کوشش کرتا ہے اور اس دوران دیکھا جا سکتا ہے ڈرائیور کا سر بری طرح سے ہاتھی کی سُونڈ کے نیچے دبے رہتے ہے اور وہ پوری کوشش کرتے ہیں کہ کسی طرح کیلے ہاتھی کے قابو میں آجائیں اور جان چھوٹے۔

آخر کار ہاتھی کیلے اپنی سُونڈ میں دبانے میں کامیاب ہو جاتا ہے اور جیسے ہی اپنی سُونڈ کھڑکی سے باہر نکالتا ہے تو ڈرائیور بس کو وہاں سے تیزی کے ساتھ بھگا کر لے جاتا ہے۔

اس ویڈیو کو پہلی مرتبہ انڈین فارسٹ سروس کے ایک افسر نے ٹوئٹر پر اپ لوڈ کیا تھا اور ساتھ ہی ایک نوٹ بھی لکھا تھا کہ جنگلی جانوروں کو خوراک نہ دیں کیونکہ وہ اس طریقے سے کھانے کی چیزیں حاصل کرنے کے عادی ہو جاتے ہیں۔