امریکیوں تک ویکسین کی رسائی کے لیے صدر ٹرمپ حکم نامہ جاری کریں گے

امریکی صدر ڈونلڈ ٹرمپ منگل کو ایک حکم نامہ جاری کریں گے جس کے تحت مختلف کورونا ویکسیز کی امریکی شہریوں تک ترجیح بنیادوں پر رسائی ہو گی۔

تاہم یہ سوالات بھی اٹھائے جا رہے ہیں کہ کیا وائٹ ہاؤس آنے والے مہینوں میں ویکسین کی مطلوبہ مقدار حاصل کر سکے گا؟

فرانسیسی خبر رساں ایجنسی اے ایف پی کے مطابق امریکہ میں چند روز میں ویکسینیشن کا عمل شروع ہو جائے گا اور صدر ٹرمپ اس حوالے ’ویکسین سمٹ‘ کی میزبانی بھی کریں گے۔

اس سمٹ کے بعد ویکسین کے حوالے سے کچھ اچھی خبریں بھی سامنے آئیں گی جس میں امریکی ریگولیٹرز کی طرف سے فائزر کی ویکسین کو محفوظ اور موثر قرار دینا بھی شامل ہے۔

امید کی جا رہی ہے کہ فائزر کو جلد امریکہ میں ویکسین کے ہنگامی استعمال کی اجازت بھی مل جائے گی اور اس حوالے سے جعمرات کو میٹنگ ہوگی۔

امریکی کمپنی موڈرنا ویکسین کے ہنگامی استعمال کے حوالے سے میٹنگ 17 دسمبر کو ہوگی۔

ایسے حالات میں جہاں امریکہ میں کورونا کیسز تیزی سے بڑھ رہے، ویکسین نے امریکیوں کے لیے امید کی کرن جگائی ہے۔

امریکہ نے فائزر کو ایک سو ملین خوراکوں کا آرڈر دے رکھا ہے۔ اب یہ سوالات بھی جنم لے رہے ہیں کہ کیا امریکہ 2021 کے وسط تک تمام آبادی کے لیے ویکسین حاصل کر سکے گا؟

ٹرمپ انتظامیہ نے ان خدشات کو رد کیا ہے اور کہا ہے کہ فائزر کے علاوہ موڈرنا کی ویکسین بھی جلد دستیاب ہوگی۔

اس کے علاوہ فائزر کے ساتھ بھی مزید خوراکیں حاصل کرنے کے لیے ڈیل چل رہی ہے۔

انتظامیہ کے ایک سینیئر اہلکار نے نام ظاہر نہ کرنے کی شرط پر اے ایف پی کو بتایا کہ ’ہم پوری طرح پُر اعتماد ہیں کہ اگلے سال کے وسط تک تمام امریکیوں کے لیے ویکسین حاصل کر لی جائے گی۔‘

واضح رہے کہ امریکہ میں کورونا کیسز کی تعداد ایک کروڑ 50 لاکھ کے قریب پہنچ چکی ہے جبکہ 15 لاکھ 55 ہزار سے زائد ہلاکتیں ہو چکی ہیں۔