بحرین: نئے کورونا وائرس کے باعث سکول بند، حفاظتی انتظامات سخت

بحرین میں نئے کورونا وائرس کے متعدد مریضوں کے انکشاف کے بعد ملک کے تمام سکولوں میں حاضری کو معطل کر دیا گیا ہے اور کلاسز آن لائن ہوں گی، جبکہ ریستورانوں میں کھانا پیش کرنے پربھی پابندی لگادی گئی ہے۔

بحرینی نیوز ایجنسی کے مطابق وزارت صحت نے کہا ہے کہ  ’یہ پابندی 31 جنوری سے تین ہفتوں کے لیے نافذ ہوگی۔‘

وزارت صحت کے مطابق ’ملک میں وبا کا جائزہ لینے والی کمیٹی نے نئے کورونا وائرس کے متعدد مریضوں کی تصدیق کی ہے۔‘

وزارت صحت کے سیکریٹری ڈاکٹر ولید المانع نے بتایا ہے کہ ’نئی صورت حال کے پیش نظر اور وبا کو قابو کرنے کے لیے چند اہم فیصلے کیے گیے ہیں جن کا مقصد رہائشیوں کی سلامتی ہے۔‘

انہوں نے مزید کہا کہ ’ملک کے تمام سرکاری ونجی تعلیمی اداروں میں طلبہ کی حاضری کو معطل کرکے تعلیمی سرگرمیاں آن لائن ہوں گی۔‘

ان کے مطابق’انتہائی ناگزیر حالات میں خصوصی نگرانی کے متقاضی طلبہ جنہیں کسی حد تک معذور سمجھا جاتا ہے، انہیں اس سے استثنٰی دیا جاتا ہے۔‘

انہوں نے بتایا ہے کہ 31 جنوری سے آئندہ تین ہفتوں تک تمام ریستوران، کافی شاپس اور کلبوں میں ٹیبل سروس معطل اور کھانا پیش کرنے پر پابندی ہو گی۔‘

انہوں نے کہا ہے کہ ’وبا کے انسداد کے لیے کام کرنے والی ٹیم پوری طرح الرٹ ہے اور نئی صورت حال پر کڑی نظر رکھے ہوئے ہے۔‘

’نئے حفاظتی اقدامات سے خوف و ہراس پھیلانا مقصود نہیں بلکہ احتیاطی حفاظتی تدابیر ہیں جن کا مقصد لوگوں کی سلامتی ہے۔‘

انہوں نے شہریوں اور مقیم غیرملکیوں کو ماسک پہننے سمیت سماجی فاصلہ برقرار رکھنے اور بھیڑ والے مقامات سے دور رہنے کی ہدایت بھی کی ہے۔