صحن کعبہ کے سنگ مرمر تبدیل

مقدس مساجد کی انتظامیہ نے  خانہ کعبہ کے صحن میں 150 مربع میٹر کے لگ بھگ نیا سنگ مرمر لگوادیا-

العربیہ نیٹ کے مطابق مسجد الحرام انتظامیہ   کے ماتحت اصلاح و مرمت کے ادارے کے انچارج محسن السلمی نے بتایا کہ مطاف ، صفا اور مروہ کے درمیان سعی والے علاقے اور اذان والے مقام (مکبریہ) کا سنگ مرمر تبدیل کرایا جارہا ہے- مسجد الحرام کے سارے صحنوں اور دالانوں میں نیا سنگ مرمر لگایا جائے  گا- حرم شریف کے جس حصے کا سنگ مرمر متاثر ہوا ہوگا اسے اول تو چمکانے کی کوشش ہوگی وگرنہ اس کی جگہ نیا لگادیا جائے گا-

السلمی نے توجہ دلائی کہ بعض حصوں میں سنگ مرمر پرانا ہوجانے کی وجہ سے اس کی تاثیر ختم ہوگئی ہے- اب وہ پہلے کی طرح ٹھنڈا نہیں رہتا-

السلمی نے بتایا کہ چالیس ٹیکنیشن اور انجینیئر چوبیس گھنٹے اصلاح و مرمت پر مامور ہیں- حرم شریف خصوصا طواف کے صحن میں جو سنگ مرمر لگایا جاتا ہے وہ کمیاب ہے- اسے خاص طور پر مسجد الحرام مکہ مکرمہ اور مسجد نبوی مدینہ منورہ کے لیے درآمد کیا جارہا ہے- اس کی خصوصیت یہ ہے کہ زائرین کو آنے جانے اور چلنے پھرنے میں سہولت رہتی ہے- یہ روشنی اور حرارت کو جذب کرتا ہے-

السلمی نے بتایا کہ یہ سارے کام عالمی معیار کے مطابق جدید ترین ٹیکنالوجی کی مدد سے انجام دیے جارہے ہیں-

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں