سعود ی نوجوان زیر تعمیر عمارت سے گر گیا، سریے جسم میں گھس گئے

مکہ میں زیر تعمیر عمارت  کے عارضی سٹرکچر سے گرنے والے سعودی نوجوان کے جسم سے سریے آر پار ہو گئے۔ فوری طور پر آپریشن کے لیے ہسپتال میں داخل کردیا گیا۔ 

العربیہ نیٹ کے مطابق سعودی نوجوان کو پہلے کنگ فیصل ہسپتال لے جایا گیا۔ جہاں ابتدائی طبی معائنہ کیا گیا۔ سریے نوجوان کے سینے میں گھس کر جسم کے پار ہوگئے تھے۔ فوری طور پر اسے مکہ کنگ عبداللہ میڈیکل سٹی ایمرجنسی وارڈ پہنچا دیا گیا۔  

سپیشلسٹ سرجنوں کی ٹیم نے فوری آپریشن کا فیصلہ کیا اور کئی ایکسرے کیے گئے۔

ڈاکٹر عمرو کی قیادت میں سرجنوں کی ٹیم نے دل کے اطراف میں خون صاف کیا پھر سرجنوں کی دوسری ٹیم نے ڈاکٹر ایھاب الحسینی کی قیادت میں نوجوان کا آپریشن کیا۔

آپریشن کے بعد نوجوان کو انتہائی نگہداشت کے شعبے میں منتقل کردیا گیا۔ اب اس کی حالت خطرے سے باہر ہے۔ 

یاد رہے کہ کنگ عبداللہ سٹی مکہ میں سپیشلسٹ سرجن سینٹر اس طرح کے پیچیدہ اور نادر آپریشن میں کمال رکھتا ہے۔

میڈیکل سٹی عالمی معیار کا ہے جہاں جدید ترین مشینیں اور اعلیٰ استعداد و تجربے کے مالک ڈاکٹرز تعینات ہیں۔ کنگ عبداللہ میڈیکل سٹی مقامی شہریوں، مقیم غیرملکیوں اور زائرین کو صحت کی سہولتیں فراہم کرنے کے لیے قائم کیا گیا ہے۔