’اب یہی باقی رہ گیا تھا‘، انڈیا میں جوڑے کی سمندر کی گہرائی میں منفرد شادی

انڈیا کی جنوبی ریاست تمل ناڈو کے دارالحکومت چینئی میں ایک جوڑے نے سمندر کی گہرائیوں میں شادی کی رسومات ادا کی ہیں۔

یکم فروری کی صبح بحر ہند کے خلیج بنگال میں وی چننادورئی اور ایس سویتھا نے نیلنکرائی ساحل کے قریب 60 فٹ گہرے پانی میں ایک دوسرے کو ہار پہنائے اور شادی کی رسم ادا کی۔

شادی کی ویڈیو سوشل میڈیا اور بطور خاص واٹس ایپ کے گروپس میں گردش کر رہی ہے۔

وی چننادورئی ایک سند یافتہ سکوبا ڈائیور یعنی غوطہ خور ہیں۔ انھوں نے میڈیا سے بات کرتے ہوئے کہا کہ 'شادی روایتی انداز میں ہوئی بس فرق صرف اتنا تھا کہ یہ پانی کے نیچے تھی۔ ہم نے اپنے پجاری کے مشورے کے مطابق صبح ساڑھے سات بجے سے پہلے کی شبھ (سعد) گھڑی میں پانی کے اندر ایک دوسرے کو ہار پہنائے اور تھالی باندھی۔'

چننادورئی اور ان کی اہلیہ سویتھا، دونوں سافٹ ویئر انجینیئر ہیں۔ لیکن سویتھا ماہر سکوبا غوطہ خور نہیں ہیں بلکہ انھوں نے شادی کے لیے ایک ماہ سے سکوبا ڈائیونگ کی تربیت لینی شروع کی تھی۔

دلھن سویتھا نے بتایا کہ وہ اور ان کے والدین شادی کے دن تک بہت نروس تھے۔ انھوں نے کہا: 'میں بہت نروس تھی اور میرے والدین بھی۔ لیکن ہمارے ساتھ آٹھ غوطہ خور تھے۔ یہ بہت سنسنی خیز تھا کہ ہم ایک ہفتے پہلے سے ہی شادی کی رسوم کو ادا کرنے کی مشق کر رہے تھے۔'

دی ٹائمز آف انڈیا کی رپورٹ کے مطابق اگر چہ دولھا اور دلھن سکوبا سوٹ میں مشق کر رہے تھے لیکن انھوں نے شادی کے دن روایتی لباس پہنے تھے۔

ڈی ٹی نیکسٹ کی رپورٹ کے مطابق وی چننادورئی نے بتایا کہ انھوں نے سمندر کو آلودگی سے بچانے کے لیے ایسا کیا۔ ان کا کہنا تھا: 'میں سند یافتہ غوطہ خور ہوں۔ ہم نے دیکھا کہ سمندر کی تہہ میں پلاسٹک، فضلے اور بطور خاص ماسک بڑی تعداد میں پڑے ہیں۔ میں نے فیصلہ کیا کہ میں زیر آب شادی کروں گا تاکہ لوگوں کو یہ احساس دلایا جا سکے کہ قدرتی وسائل کو آلودہ نہ کریں۔'

سوشل میڈیا پر بھی اس شادی کا چرچا ہے۔ کسی نے اس کو سراہا ہے اور اسے اپنے انداز کی انوکھی چیز کہا تو کسی نے لکھا کہ ’اب یہی باقی رہ گیا تھا۔‘

خیال رہے کہ شادی کو لوگ یادگار بنانے کے لیے اپنے اپنے انداز اور حیثیت کے مطابق خاصا اہتمام کرتے ہیں۔ لاک ڈاؤن کے سبب تقریبا ایک سال سے شادیوں کی تقریبات بڑی حد تک متاثر رہی ہیں تاہم لوگ اس کے باوجود تقریب کو یادگار بنانے کی کوشش کرتے ہیں۔

کچھ دن پہلے جنوبی ہند کے ہی ایک جوڑے نے شادی کے بعد ہنی مون کی شوٹنگ کرائی تھی جو کہ سوشل میڈیا پر بحث کا موضوع بنی تھی۔